Melek Avci

 

ANQARA - Endama Komîteya Amadekare ya Newroze ya Lubnanî Hanan Osmane derheqê Komployê Mîyanneteweyî yê hemverê Rayberê PKKyî Abdullah Ocalanî de vat: “Komplo de rolê DYAye çinî bibayêne do Tirkîya nê operasyonî lêşin temam nêkerdêne. Ewro zî binpaykerdişê heqan yê Tirkîya nêvînayîş ra yeno û komplo dewam keno. Seba Tirkîyayêke newe û demokratîke ganî bi Ocalanî reyde pêvînayîş bêro kerdiş. Mifteyê aştîye o yo.” 

 

9ê Teşrîna Verêna ya 1998î de hemverê Rayberê PKKyî Abdullah Ocalanî ke Sûrîye ra vejîya komployê mîyanneteweyî dîya destpêkerdiş. 4 aşme ra dima zî 15ê Sibata 1999î de Yewnanîstan ra ame remnayîş û teslîmê Tirkîya ame kerdiş. Nê komployî de xeylê welat û hêzê emperyalî ca girewtî. 

 

Endama Komîteya Amadekare ya Newroze ya Lubnanî Hanan Osmane derheqê komployî de û paradîgmaya Rayberê PKKyî Abdullah Ocalanî ke vilayê dinya bîyo de ercnayîş kerd. 

 

* Tirkîya bi serran o serê Rayberê PKKyî Abdullah Ocalanî de polîtîkaya tecrîdî pê ana û ne keye ne zî avûkatan reyde nêeşkeno pêvînayîş pê bîyaro. Şima na babete senî ercnenê? 

 

Komployê hemverê Ocalanî xeylê peyman û normê mîyanneteweyî binpay kerd. Lîderê şarêk ganî ame tepiştiş û tecrîdkerdiş. Na polîtîkaya ke vera Birêz Ocalanî de yena rayîr ra berdiş, vera peymanê heqê merdiman a. Tecrîdo ke pê yeno binpaykerdişê qanûn û peymanê mîyanneteweyî yo. No yeno manaya astengkerdişê fikr û zîhnê Rayber Abdullah Ocalanî. Abdullah Ocalan sey roşnayêk heme cayê tarîyan teng kerd. Semedo ke heme şarê herême azadî bibî ganî xoverdayîş bêro dayîş. 

 

*Abddullah Ocalan seba çareserîya problemê kurdî wayîrê rolêk muhîm o. La tu xeberêk ci ra nîna girewtiş. Şima na babete senî ercnenê? 

 

Belê Birêz Ocalan çareserîya problemê kurdî de wayîrê rolêk muhîm o. O mifteyê aştîye yo. Seba Tirkîyayêke newe û demokratîke ganî Ocalanî reyde dîyalog bêro destpêkerdiş. Seba Şarê tirkî, kurdî û heme şaran ganî pêvînayîş bidîyo destpêkerdiş. Birêz Ocalan sey lîderêk tarîx de yeno qebulkerdiş, mifteyê aştîye yo. Birêz Ocalan semedo ke bi dewleta tirke reyde çareserîya hempar pê bîyaro, ganî pêvînayîş bidîyo destpêkeridş. Tabî qet şik çin o ke polîtîkaya dişmenî û înkarî ya Tirkîya de rolê NATOye gird o. 

 

* Hêzê mîyanneteweyî senî vera tecrîdî de hende bêveng manenê? 

 

Hêzê mîyanneteweyî seba ke biresê menfîetê xo, herêma Rojhelatê Mîyanenî her tim kerdî merkezê şer û pêrodayîşî. Coka ra zî projeyê cuya pîya û demokrasîye ke Abdullah Ocalan ardo, nîno hesabê hêzê mîyanneteweyî. Coka ra zî vera binpaykerdişê Tirkîya de bêveng manenê. 

 

* Afrîka de derheqê paradîgmaya Abdullah Ocalanî de xebatî yenê rayîr ra berdiş. Vanê ke do xeta şorişê newe Bakurê Afrîkaye de aver şêro. No fikr do krîzê modernîteya kapîtalîstî yê dinya çareser bikero?

 

Demê peyênan de xeylê welatê Rojhelatê Mîyanen û heta Başurê Afrîkaye de serê fikrê Abdullah Ocalanî de konferans û bernameyî pê ameyî. Ma zî tewrê tayinan bîyî. Sere de Afrîka, Misir, Urdun, Lubnan û Iraqî ra kesî tewrê kombîyayîşan bîyî û vatî ke semedo ke fikrê Ocalanî komelî de bêro vilakerdiş ganî hîna zêde xebate bêra rayîr ra berdiş. Na felsefe tena hetê roşnvîran ra nê, hetê cinîyan û heme hetê komelî ra zî yena qebulkerdiş. Bawer kenê ke felsefeya Ocalanî do demokrasîye pê bîyara. Şorişgerê Afrîkaye zî vera hêzê kapîtalîstî de felsefe û fikrê Ocalanî sey hêvî vînenê. Birêz Ocalan semedê azadîya şaranê Rojhelatê Mîyanenî û heme şaranê Dinya bikero binê garantîye, venga têkoşîn û xebate keno.

 

* Vera polîtîkayê tecrîdî de bêvengîya DYA û welatê Ewropa sey tesdîqkerdişî yan zî sey paştîdayîşî eşkeno bêro binamekerdiş? 

 

Birêz Ocalan wina vano: “Hêzê komploger, têgêrayîşê ma yê vera projeyê gird ê Rojhelatê Mîyanenî vînenê û coka ra wazenê asteng bikerê. Coka ra vera partî û lîderê înan de hêriş dayî destpêkerdiş. Teslîmkerdişê mi zî girêdayeyê senaryoyê dagirkerdişê Iraqî bî. Vera mi de operasyon dayî destpêkerdiş. No komplo dest pêkerdişê şerê hîrine yê dinya bî.” Belê no raşt o. Tepiştişê lîderêk de rolê DYAye eke çinî biyayêne, Tirkîya nêeşkayêne no operasyonê lêşin temam bikera. Ê ke Ocalanî teslîmê Tirkîya kerd DYA bî. Coka ra zî komplo dewam keno û vera tecrîdo giran de bêvengî. 

 

* Qerarê DMMEye pê nînê û vera heme binpaykerdişan hemkarîya welatê YEye bi Tirkîya reyde dewam kena. Şima na rewşe senî ercnenê?

 

Heme hêz û welatî gladyatorê NATOye yê. Mîsyonê Tirkîya zî tena pawitiş o. Şeran de Tirkîya her tim erzenê cepheyê aver. Tirkîya zî goreyê qanûn û rêziknameyê înan tegêrena. Sîstemo ke Îmraliyî de pê yeno sîstemêk mîyanneteweyî yo. Ewropa zî mîyanê nê karî de ya.