ANQARA - Endama Kolektîfê Madrîdî ya Rojawan Azadî, Consuelo Nuneze qala naskerdişê jîneolojî û Nagîhan Akarsele kerd û vat: “Zanistê cinî hêzo ke ma cayê xo tarîx de fehm bikerê dano. Camêrdê ke talîmat dayî, hêz û kapasîteya Nagîhane ya ke îradeyê cinî aver berdêne, zanayêne.” 

 

Endama Merkezê Cigêrayîş û Jîneolojîye akademîsyen û rojnameger Nagîhan Akarsele 4ê Teşrîna Verêne ya 2022yî de Başurê Kurdistanî bajarê Silêmanîyê de verê keyeyê xo de netîceyê suîkastî de ameye qetilkerdiş. 

 

Serrgêra qetilkerdişê Nagîhane de, Endama Kolektîfê Madrîdî ya Rojawa Azadî, Consuelo Nuneze hem jîneolojî hem zî suîkastî ercnaye. 

 

Naskerdişê Jîneolojîye 

 

Consueloye hîkayeya xo ya naskerdişê jîneolojîye wina vat: “Mi zanistê cinî 2017-2018î de nas kerd. Bajaro ke tede mendêne de kombîyayîşêk derheqê jîneolojîye de virazîya. Tarîx baş nîno vîrê mi. Cinîyêke ciwane Yewîya Ewropaya Jîneolojîye ra merkezê kulturî de semînerêk da. Ez zî tewrê semînerî bîya. O wext bi wesîleya ciwanê enternasyonalî têkilîya mi bi têgêrayîşê kurdî reyde awan bî. Ez derheqê têkoşînê kurdan û tarîxê kurdan de agahdar bîya la babeta nê kombîyayîşî seba mi çîyêk newe bî. Malumatê ke ameyî parekerdiş tesîrêk gird mi ser de kerd. Semedo ke çîyê malumatê ke ameyî vatiş, malumatê ke mi unîversîteye ra girewtbî ra cîya bî. La babetêk balkêş bî û semîner mi ant wendişî ver.”

 

‘Nuşteyê aye hem hîs û hem zî zelalî hewênayêne’

 

Consueloye qiseykerdişê xo wina dewam kerd: “Wexto ke mo jîneolojî kifş kerd, mi îmkanê wendişê nuşteyê Nagîhane dî. Mi çend nuşteyê aye waşt. Têlikîya mi bi aye reyde kilm bî û hende zî hîssin bî. Ez muhîmîya xebatanê aye yê derheqê têkoşînê cinîye de badê şehadetê aye musaya. Nuşteyê aye yê yewine ke mi wend ‘Firtinanin Sezgîsî’ bî. Nuşteyê aye hem hîs û hem zî zelalî hewênayêne.”

 

‘Kesê ke talîmat dayî kapasîteya Nagîhane zanayêne’ 

 

Consueloye dîyar kerd ke suîkasto ke vera Nagîhane de pê ame şexsê aye de vera cinî û jîneolojîye de pê ameyo û wina dewam kerd: “Camêrdê ke talîmat dayî, hêz û kapasîteya Nagîhane ya ke îradeyê cinî aver berdêne, zanayêne. Vatişê aye înan aciz kerdêne. Aye cinîyêk serkêş bî û beyraqe berz kerdbî. Aye serkêşêk taybet bî. Ma na bawerîye de yê ke ma cinî nuqtayêk muhîm ê têkoşînî de yê. Coka ra ma tena seba heqanê xo nê, seba bedilnayîşêk global ê dinya têkoşîn danê.”

 

‘Seba ke ma cayê xo yê tarîxî fehm bikerî jîneolojî eşkeno hêz bido ma’ 

 

Consueloye bale ant serê çekuya jîneolojîye ke yewin rey serra 2008î de Rayberê PKKyî Abdullah Ocalan kitabê xo yê ‘ozgurluk sosyolojîsî’ de şixulnabî û wina qiseykerdişê xo peynî kerd: “Cinî se ra 50ê komelî ra pê yena. Ma cinîyî zaf girêdayeyê xozaye yê. La ganî ewil ma xo nas bikerê. Çike tarîxê ma ame vîrîkerdiş. Zanistê cinî hêzo ke ma cayê xo tarîx de fehm bikerê dano. Tabî ez tewrê paradîgmaya Birêz Ocalanî bena. Têkoşînê cinîya kurde serkêşê femînîzmî yo. Xeylê femînîstî zî nê çîyî qebul kenê. Hema xeylê çîyê ke ma bikerê esto.”