Rojda Aydin

 

WAN - Behîce Kayaye di serrî verê cû netîceyê hêrişê hewayî yê Tendurekî yê Agirîyî de lajê xo vînî kerd û hema zî cenazeya lajê xo nêgirewta. Behîceye dîyar kerd ke wa peynîya îşkence û zilmê vera cenazeyan bêra. 

 

12ê Hezîrana 2021î de herêma Tendurekî ya Agirî de bado ke pêkewtiş vejîya hêrişê hewayî dîya destpêkerdiş. Netîceyê hêrişî de Kasim Kaya (Şoreş Andok) ê HPGyî dinyaya xo bedilnabî. Vera ke keyeyê ci heta nika 3 reyan seba DNAye nimuneyê gonî bido zî cenaze hema zî nêameya dayîş. Bedo ke Kasim Kaya dinyaya xo bedilneno vera keyeyî de zilm zî zêdîyeno. Dadîya Kaimî, Behîce Kayaye di serrî yo cenazeya lajê xo gêrena. 

 

Behîce waştişê cenazeya lajê xo kerd û eynî wext de venga peynîardişê şerî kerd û ercnayîşê xo ajansê ma JINNEWSî rê pare kerd. 

 

3 reyan gonî da, la cewab çin o 

 

Behîce ard ziwan ke lajê aye serra 2013î de tewrê refanê Têgêrayîşê Azadîye bîyo û serra 2021î de zî Tendurek de dinyaya xo bedilnayo. Behîce da zanayîş ke aye televîzyon ra musaya ke lajê aye dinyaya xo bedilnayo û wina vat: “Bado ke ma musayî mêrdeyê mi û çend merdimê ma pîya şîyî uca. Wexto ke şîyî dozgerîye persê cenazeye kerd, dozgerîye persê sey ‘Kam şima rê vato, şima ça ra zanê? Partî şima rê vat’ pers kerdo. La mêrdeyê mi û merdimê ma vatî ma televîzyon ra musayî. Dozgerîye vat ‘Raşt o ma kişt û kerd goristanê bêkesan’. Ma cenazeya xo waşt. Ma rê vatî şêrê gonî bigîrê û ma şîyî gonî da. La cenazeya ma nêdanê ma. Bado ke mêrdeyê mi agêra Wan reyna ci gêrayî vatî bêrê gonî bidê û mêrdeyê mi reyna şî gonî da. La reyna cewabê DNAyî nêdayî, heta par hamnanî. Reyna gêrayî û vatî bêrê gonî bidê û dima ra ez şîya mi gonî da. La şehîdbîyayîşê lajê mi sero ra di serrî derbaz bî, hema zî cenazeya ci nêdayî ma. La xeylê cayan ra persê cenazeya lajê xo kenê. La hema zî tu cewabêk nêdayî ma.”

 

‘Wa êdî no şer vindero’ 

 

Hêvî û waştişê Behîceye no yo ke cenazeya lajê xo bivîna û wina qisey kerd: “Ez dadî ya û kesebaya mi veşêna. Ez wazena cenazeya lajê xo bivîna. Ez ewnîyena dadîyê ke tutê înan şehîd kewtî, ê şinê serê mezelê tutanê xo la mezelê lajê mi çin o ke ez şêra. Wa esteyê lajê mi bidê mi û ez şêra mezelê ci ser de dua bikera. Ez dewlete ra tena cenazeya lajê xo wazena. Ma heta nika 3 rey gonî da la cewab nêdayî ma. Wazenê bi no hawa zilm dadî û keyeyan bikerê. Venga mi hem dadîyan ra esta ke wa vera şerî de bivejê û vajî ke na gonîye bidê vindarnayîş. Ma têduştî wazenê. Ma cuyêk weş û asayî wazenê. Ma kurd ê û ma aştîye wazenê. Ma dadî wirzê payan ser û şer bidê vindarnayîş. Şewatê zerrîya heme dadîyan sey seyyewbînan o.” 

 

‘Yew dîn û bawerîye de no caardiş çin o’ 

 

Behîceye qiseykerdişê xo yê peyênan de bale ant serê cenazeyê ke qutîyan de ya zî bi rayîrê kargoyan teslîmê keyeyan yenê kerdiş û wina peynî kerd: “Edalet de çîyêk winasî çin o. Yew dîn û bawerîye de no caardiş çin o. Ganî hurmet nîşanê cenazeyan bidê. Kesebaya ma dadîyan veşêna. Ewro kam beno wa bibo wexto ke dinyaya xo bidebilno ma eynî hurmetî nîşan danê. Qey ê hurmet nîşanê cenazeyanê ma nêdanê. Îşkence û zilm yeno kerdiş.”