AMED - Welatijan dîyar kerdî ke Şaredarîya Bajarê Girdî ya Amedî ke binê îdarekarîya qeyûmî de ya, qerarê rijnayîşî keyeyanê dorê Parkê Anzele girewta. Welatijan reaksîyon vera rewşe mojnayî û dîyar kerdî ke do hemverê nê de xoverdayîş bidê.

 

Dimayê ke qeyûm tayînê şaredarîyê HDPyî ame kerdiş, hêrişê hemverê şarî zî dewam kenê. Şaredarîyê ke bîyê raşteyê rant û bêusulî nika zî merdiman keyeyê înan ra kenê.

 

Şaredarîya Bajarê Girdî ya Amedî ke destê qeyûmî de ya, seba awanîyê dorê Parkê Anzele yê qezaya Sûrî ya bikera raşteyê parqî, qerarê rijnayîşî girewte.  Welatijê dorê parqî de ciwîyenê derheqê rewşe de qisey kerdî.

 

‘Ma do heta peynî xo ver bidê’

 

Fatma Karaot a 35 serrî dorê Parkê Anzele de ciwîyena dîyar kerd ke şaredarî wazena dorê Anzele zî bikera parq û seba nînan zî keyeyan rijnena. Fatma wina vat: “Seba keyeyê ma nêrê rijnayîş, ma do heta peynî têkoşîn bikerê. Bê destûr wazenê keyeyê ma birijnê. Keyeyo ke ez ci de ya, ê embaza min a. Rewşa ma baş nîya. Ez nêeşkena kîra bidî embaza xo. Şaredarî keye birijno, ez keye wazena. Seba ke ez nêeşkena kîra bidî keyeyêk bîn.”

 

‘Ma çira hedef ameyî girewtiş ma fam nêkerd’

 

Nebahat Erene zî dîyar kerd ke aye zî dorê Anzele de ronişnena û wina vat: “Ma fam nêkerd qeyûm çira keyeyê ma hedef gêno. Awanîya ma 4 awanî û 5 dikan ê. Ma keyeyê xo bi pereyê ke danê nêdanê înan. 300 hezar danê ma. Ma 300 hezar se bikerê? Pê keye yeno? Ma do perîşan bibê. Ma çadire ronê?”

 

Welatijêke bîn zî reaksîyon vera rewşe mojna û vat, do bi rijnayîşê keyeyan reyde mexdûr bibê û şaredarî zî dewa akerda û wina vat: “Seba keyeyê xo nêvejîyaya, dewa mi rê akerdî. Mi vat şima trilyon zî bidê ez nêvejîyena. Bi çend rey seba nê ma vejênê dadgehe.”

 

‘Seba keyeyê ma 182 hezar danê’

 

Hanim Ozkoçak zî wina vat: “Şaredarî ra ameyî. Vatî do keyeyê şima û yê bînî bêrê rijnayîş, vera ci parqî bêrê akerdiş. Keyeyê mi kerrayê verî yê Amedî ra ameyê viraştiş. Keyeyêk kehn o. Dimayê ke keyeyê ma rijnayî, vatî keye nêdanê ma. Ma mecbûr î vat pereyê keyeyî bidê ma. Qerarê 182 hezarî dayî. Bi nê pereyî çîyêk nîno girewtiş.”