Oznûr Deger

 

MÊRDÎN - Aktîvîsta TJAye Ayşe Bozane derheqê kampanyaya ke bi sloganê ‘Bi cinî cuye azadî reyde ver bi azadîye’ dîyaya destpêkerdiş de qisey kerd û dîyar kerd ke kampanya do 6 aşman dewam bikera û hîrê lingan ser de do aver şêra û vat: “Ganî ma seserra 21ine bikerê seserra serkewtişî û azadîya cinîyan. Coka ra zî ez venga heme cinîyê dinya, cinîyê Tirkîya û cinîyê Mêrdînî kena ke paştîdayîş bidî kampanyaye. Ganî ma wayîrê destkewtişan bivejê. Ma dest bidî yewbînan û ser bikewê.” 

 

Têgêrayîşê Cinîyê Azade (TJA) bi sloganê ‘Bi cinî cuye azadî reyde ver bi azadîye’ û sloganê ‘Jin, jiyan, azadi’ startê kampanyaya newe da. Metnê kampanyaya ke ameyo weşanayîş de cinîyî bale ancenê serê polîtîkayê şerê taybet û hêrişê ke Kurdistan de yenê kerdiş û tesîrê tecrîdî yê serê cinîyan de keno. 

 

Aktîvîsa TJAye Ayşe Bozane derheqê kampanyaya ke dîyaya destpêkerdiş de qisey kerd.

 

‘Riha seba ma herra pîroz o’ 

 

Ayşe da zanayîş ke kampanya ke dayî destpêkerdiş kampanyayêke 6 aşman a û startê ci Riha, Şirnex û Stenbolî de dayî. Ayşeye bale ant serê herêmê ke ameyî tercîhkerdiş û wina vat: “Riha seba ma zaf muhîm o. Hem herra pîroz o û hem zî Rayberê Şarê Kurdî uca de ameyo dinya. Coka ra seba ma muhîm o.”

 

‘Kurdan ser de polîtîkayê qirkerdişî yenê rayîr ra berdiş’ 

 

Ayşe dewamê qiseykerdişê xo de bale ant serê lazimîyê kampanyaye û wina vat: “Komel açarîyayo goristanê heqan. Polîtîkayê asîmîlekerdişî û çinîkerdişî yê zîhnîyetê serdest ê camêrdî zêde bîyo. Coka ra zî lazimî bi kampanyaye ame dîyîş. Lazimîya komelî zî bi kampanyayêke winasî estbî. Herra ma ser de polîtîkayê koçberkerdişî wina zêde bîyî, êdî kes nêwazeno na herre ser de vindero. Tecrîdê Îmraliyî tesîrêk gird serê şarê ma de keno. Serê şar û kurdan de polîtîkayê qirkerdişî yenê rayîr ra berdiş. Heqê Merdiman yeno binpaykerdiş. Polîs û leşker destdergê bi cinîyan kenê, bi tutan kenê. Na polîtîkayêke sîstemî ya.”

 

‘Polîtîkayêke gird ê zilmî yena ferzkerdiş’ 

 

Ayşe qala tecrîdo ke zîndanan de dest pêkerdo û vilayê pêroyê komelî bîyo kerd û vat: “Teber zî êdî bîyo sey zîndanêk gird ê akerde. Vera heme hetanê ke azadîye wazenê, heqanê xo wazenê hêriş pê yenê. Qewimîyayîşê gird ê sey erdlerzî zî sey haletî şuxilnenê. Feqîrî hende sînorê xo derbaz kerdo ke kes nêeşkeno tutan gird bikero. Şarî ser de polîtîkaya gird ê zilmî yena kerdiş.”

 

‘Ganî ma çalakîyan pê bîyarê’ 

 

Ayşe bale ant serê amac û mîyaneyê kampanyaye ser û wina vat: “Lazimî bi perwerde û rêxistinbîyayîşî esto. Ganî êdî her raşteyî de çalakî pê bêrê. Ma vera tîryak, fuhuş, destdergê, kiştişê cinîyan de ganî raşteyan de bî û xo bi rêxistin bikerê. Ganî ma çalakîyan pê bîyarê. Kampanya do 6 aşman dewam bikera û serê 3 beşan pê bêra. 2 aşmê ewil do perwerde pê bêro. Heme cinîyî do bieşkê tewrê dewreyê perwerdeyî bibê. Dimayê perwerdeyî do kombîyayîş pê bêrê û goreyê lazimîya komelî xebat bêrê rayîr ra berdiş. Seba seserra 21ine biba seserra azadî û serkewtişî ma do têkoşîn bikerê. Ganî ma dest bidê yebînan û ser bikewê.”