DÎLOK - Xebat Gengeça şî pêvînayîşê lajê xo û datîzayê xo yê tepişte la derheqê aye de dewa ameye akerdiş û 6 serrî û 6 aşme ceza ameye birnayîş. Xebate da zanayîş ke seba ke biewna tutê xo yê se ra 98 astengdar ganî ceza bêra wedaritiş û vat: “Lajê mi astengdar o, kes çin o biewno. Ez nêba do kam biewno.” 

 

Xebat Gengeça 53 serrî Şahînbeylî yê Dîlokî de ciwîyena. Bi bahaneyê tewrê xebatê siyasî bîya xeylê dewayî derheqê aye de ameyî akerdiş û girewtiş. Di serrî tepişte menda. Xebate tewr peynî şî pêvînayîşê lajê xo yê tepişteyê siyasî û datîzayê xo la derheqê aye de dewa ameye akerdiş û 6 serrî û 6 aşme ceza ameye birnayîş. 

 

Xebate da zanayîş ke 8 tutê aye estê û înan ra yew zî se ra 98 astengdar o û vat: “Ez ewnîyena tutanê xo ra. Tena ez eşkena biewna. Ez wazena na dosya bêra girewtiş. Tutê mi hetê psîkolojîk de tesîr benê. Lajê mi polîsan ra terseno. Wexto ke ber pirodîyeno terseno. Tena destê mi ra nan û awe weno.”

 

‘Zext û zilm Dîlok de zî dewam kerd’ 

 

Xebate dîyar kerd ke serra 1994î de qezaya Cizîrî ya Şirnexî ra zextê dewlete vera koçê Dîlokî kerda û vat ke xeylê zilm dîya. Xebate ard ziwan ke zilm û zextî Dîlok de zî dewam kerdî û wina dewam kerd: “Ma sey kaçaxan bi nimite dewa xo ra vejîyayî. Ma ameyî tîya, ma tersan vera nameyê xo bedilna. Ma vatêne do kontra ma bikişo. Mi nameyê xo kerd Ayşe. Lajê mi 15 serrî ame tepiştiş. Lajê mi bi îşkenceyî berdî. Ez xora şîbîya. Lajê mi zit kerdbî û berdî. Yew serrî zîndanê Pozantiyî de mend. Yew serrî ra dima serbest verdayî. 20 roje ra tepîya reyna bi îşkence lajê mi berdî. Uca de kewt 18 serrî ya xo. Uca ra zî berdî Osmanîye. Wextêk uca de tepişte mend.” 

 

‘Bombeyê sîsî eştî keye’ 

 

Xebate dîyar kerd ke bombeyê sîsî eştî keyeyê aye û qiseykerdişê xo wina domna: “Semedo ke ez şîya pêvînayîşê lajê xo û datîzayê xo serra 2020î de dewa mi rê ame akerdiş. Ez ameya tepiştiş. Tutê mi tena mendî. Yew hema şenik bî, yew zî astengdar o. Ez yew serrî tepişte menda. Dima ra serbest ameya verdayîş. Ez şîya pêvînayîşê lajê datê xo. Reyna ez ameya destbendkerdiş. Bombeyê sîsî eştî keyeyê mi. Vîşêrê mi kes nêewnîyeno tutê min ê astengdarî ra. Ez keye de nêba kes nêeşkeno biewno ci. Do tutê mi bêwayîr bimano. Nika 24 serrî yo. Nêeşkeno qisey bikero, nêeşkeno çîyêk bikero.”

 

‘Lajê mi terseno ke mi berê’ 

 

Xebate qiseykerdişê xo yê peyênan de nê çîyan vat: “Seba ke ceza bixerepîya mi muracatê mehkemaya corîn kerd. Nika dewa mehkema de ya. Paştîdayîş zaf muhîm o. 6 serr û 6 aşme ceza dayî mi. Ma wijdanê înan çin o. Mi se kerd, mi merdim kişt, mi dizî kerd, mi tîryak rot? Mi tena vat ‘ez kurd a’. Ez şîya pêvînayîşê lajê xo. Ez venga heme kesî kena. Ma wayîrê yewbînan bivejê. Ma wayîrê yewbînan nêvejê do no zilm ma hemeyan bikişo. Lajê mi yê bîn 10 serrî yo tepişte yo. Kesebaya mi veşêna. Lajêk mi astengdar o. 6 serr û 6 aşme ceza birîyaya. Waştişê mi no yo ke dosya peyser bêro antiş.”