Marta Somek

 

STENBOL - Hemsereka SGDFyî Yaren Tuncere dewaya bi îdiayê endamtîya rêxistine ra ameyêne muhakemekerdiş û 14ê êlule de roniştişê diyîne de ameye tehlîyekerdiş. Yarene da zanayîş ke vera heme zextanê îqtîdarî vernîya yadkerdişê 33 raywanê xeyalî nêame girewtiş û rayîrê xoverdayîşî têkoşînê êkoşînê yewbîyaye ra derbaz beno. 

 

12ê Adare de çarçeweya tehqîqato ke hetê Serdozgerîya Komare ya Stenbolî ra ame rayîr ra berdiş de Stenbol, Anqara û Edene de sereştişê keyeyan ame kerdiş. Mîyanê înan de hemserekê ESPyî, Federasyonê Komeleya Ciwanê Sosyalîst (SGDF), endamê Meclîsê Cinîyê Sosyalist (SKM), muxabîra ETHAye Elîf Bayburte zî tede 11 kesî ameyî destbednkerdiş û 15ê Adare de Şukran Yaren Tuncer, Senem Nur Pektaş, Alev Ozkîkraz, Tanya Kara, Ozge Dogan, Bîrkan Polat, Can Papîla, Denîz Bahçecî û Okan Danaci ameyî tepiştiş. 

 

Hemsereka SGDFyî Yaren Tuncer û Okan Danaciyî ke bi îdiayê endamtîya rêxistine ameyêne muhakemekerdiş 14ê êlule de roniştişê diyîne de serbest ameyî verdayîş. Yaren û Okanî verê zîndanê Sîlîvrî de hetê keye û embazanê xo ra ameyî pêşwazîkerdiş. 

 

Yarena ke hewteyo vêrêne de tehlîye bî derheqê çîyê ke îdianame de nusîyayî, prosesê muhakemekerdiş û têkoşînê edaletî de JINNEWSî rê qisey kerd. 

 

Amacê înan çimtersnayîş û krîmînalîzekerdiş o 

 

Yarene dîyar kerd ke dosya û îdianameyo ke ameyo hadrekerdiş de tu çîyêk çinî bî û vat: “Hetê huqûqî de tu çîyêk ke ma vajî suc o çinî bî. La tabî semedê serdestan, îqtîdaro siyasî û faşîzmî xeylê çîyî estî. Bi serran zextê serê têgêrayîşê ciwanan kenî. Wazenê têkoşînê ciwanê sosyalîst bipelçiqnî. Wazenê neslêk sereçewt ê goreyê xo awan bikerî. La nêeşkenê nê çîyî bikerî. Coka ra zî hêrişê xo zêdînenê. 12ê Adare de sereştişê keyeyan de ma ameyê destbendkerdiş û tepiştiş. Bi no hawa hewl dayî ma bitersnî û bipelçiqnî.”

 

‘Tewrbîyayîşê 8ê Adare zî suc o’ 

 

Yarene bale ant serê çîyê ke îdianame ameyî nuştiş û vat ke tewrbîyayîşê çalakîyan ‘Ma nêeşkenê îdareyê xo bikerî’ zî suc ameyo hesibnayîş û wina dewam kerd: “Yadkerdişê embazê xo, tewrbîyayîşê 8ê Adare û 25ê Teşrîna Peyêne zî suc hesibnayî. Vîşêrê înan têkoşîn edaletî yê seba Pirsûsî bîyo bahaneyê sucî. Semedo ke seba înan tehlukeyêk gird o. pirsûs de serra 2015î de hêrişê DAIŞî de embazê ma ameyî qetilkerdiş. 8 serrî derbaz bî, hema zî kiştox nêvejîyayî raşte. Seke no qirkerdiş siyasî bo mojnayî û proses wina rayîr ra berdî. La vera her çîyî ma do têkoşînê xo yê edaletî yê seba Pirsûsî dewam bikerî.” 

 

‘Nêeşkenê vernîya yadkerdişê rayvanê xeyalî bigêrî’

 

Yarene dewamê qiseykerdişê xo de ard ziwan ke tena zext SGDFyî nîno kerdiş û bat: “Kesê ke Pirsûs de birîndar bîyî, kesê ke sey dadîya Besnaye ke domanê xo Pirsûs de vînî kerd, embazê ma yê ke têkoşînê edaletî danî zî bi tedhîd, tepiştiş, zext û şîdetî reyde yenê rî bi rî. Her yadkerdişê Pirûsî de zext û îşkence yeno kerdiş. Vera nê caardişan ma fek yadkerdişê 33 rayvanê xeyalî nêverdenê. Bi şeklêk ma înan yad kenî. AKP-MHP her yadkerdişî de zextan keno. Bi nê zextan wazenê vernîya têkoşînê edeletî bigêrî. Qirkerdişê Pirsûsî qirkerdişê tewr gird ê tarîxî yê ciwanan bî. Vera nê qirkerdişî de têgêrayîşê ciwanan hema zî têkişt de yo û têkoşîn dano.” 

 

Rayîrê xoverdayîşî têkoşînê yewbîyaye yo 

 

Yarene qiseykerdişê xo wina peynî kerd: “Vera zextan de çareserî têkoşînê yewbîyaye ra derbaz bena. Seba ke zext û polîtîkayê faşîstî yê AKP-MHPyî bêrî şikitiş ganî têkoşînê yewbîyaye bêro dayîş. Coka ra zî têkoşînê 8 serrî ke yeno dayîş xeylê muhîm o. Semedo ke hesabpersayîş esto. Semedo ke hesabê embazanê xo bipersî têkoşînêk esto. No xeylê muhîm o. Ez venga heme embazanê xo kena ke bi têkoşînê yewbîyaye cewab bidî polîtîkayê zextî.”