MERKEZÊ XEBERAN - Şubeyê ÎHDyî yê Şirnexî, Wan, Edene, Mêrsîn, Îzmîr, Riha û Dîlokî bi eşkerayîyêke hempar astengkerdiş û destbendkerdişê Dayîkê Şemeyî şermezar kerdî û mesajê "Dayîkê Şemeyî tenê nîyê" ame dayîş. 

 

Dayîkê Şemeyî bi waştişê merdimê înan yê destbendkerdişî de ameyî vînîkerdiş, bêrê vînayîş û faîlê înan bêrê muhakemekerdiş her hewte roja şemeyî Raşteyê Galatasarayî de çalakî organîze kenê. Dekewtişê Raşteyê Dayik/Merdimê şemeyî pêwa qerarê Dadgeha Destûrê Bingehîn (DDB) yenê astengkerdiş. Xeylêk bajaran de astengkerdişê raşteyî bi eşkerayîya çapemenîye ameyî şermezarkerdiş. 

 

Şubeyê ÎHDyî yê Şirnexî, Wan, Edene, Mêrsîn, Îzmîr, Riha û Dîlokî zî bi eşkerayîyêke hempar astengkerdiş û destbendkerdişê Dayîkê Şemeyî şermezar kerdî. 

 

Şubeyê ÎHDyî yê Şirnexî seba paştdayîş bido Dayîkê Şemeyî qezaya Cizîre de eşkerayî da çapemenî. Îdarekarê Partîya Çep a Keske, Baroyê Şirnexî û temsîlkarê TÎHVî tewrê eşkerayîye bîyî. Eşkerayîye eywana ÎHDyî de ameye dayîş. Eşkerayîye de pankartê, “Raşteyê Galatasarayî yê Dayikê Şemeyî yê", “Wa vînîbîyayeyî bêrê vînayîş faîlî bêrê muhakemekerdiş” ame akerdiş.

 

Îdarekarê Şubeyê ÎHDyî yê Şirnexî Devran Kara eşkerayîye wend. Eşkerayîya nê hewteyî de aqûbetê Yahya Yakut ame perskerdiş û nê çî ame vatiş: "Çiqas serrî derbaz bibê zî seba Yahya Yakutî ma do fek waştişê edaletî ra vera nêdê. Ganî dewlete goreyê mîqyasê huqûqî têbigîro û ma do fek Raşteyê Galatasarayî ra vera nêdê.”