ŞIRNEX - Hemsereka HDPyî ya Cizîrî Zîlan Ecevîte derheqê tecrîdê serê Rayberê PKKyî Abdullah Ocalan ke komelî ser de zî tesîr keno ercnaye û da zanayîş ke tecrîd şerê taybet bixo yo û wina vat: “Şexsê Birêz Abdullah Ocalanî de tecrîd serê heme komelî de pê yeno. Ma zîndanan de nêbê zî raşteyê ma binê tecrîdî de yê. Her raşteyêk de wesayîtê zirxî gêrenê. Botan de merdim nêeşkeno veyveyan de deyîran bivajo. No netîceyê polîtîkayê tecrîdî yo. Seba ke kurdî bibê wayîrê statu ganî tecrîd bişikîyo.”

 

Tecrîdê serê Rayberê PKKyî Abdullah Ocalanî her ke şino giran beno. Bi giranbîyayîşê tecrîdî reyde Kurdistan de polîtîkayê şerî vejîyenê û serê şarê kurdî de polîtîkayê şerê giran benê. Hemsereka Partîya Demokratîke ya Şaran (HDP) ya Cizîrî Zîlan Ecevîte tesîrê tecrîdî yê serê şaran, cinî û ciwanan ercnaye. 

 

‘Tecrîd polîtîkaya şerî bixo yo’ 

 

Zîlane dîyar kerd ke tecrîd bixo polîtîkaya şerê taybetî yo û wina dewam kerd: “Kurdistan de bi taybet Botan de polîtîkayê şerî zaf giran ê. raşteyê komelî de serê cinî, ciwan, tutî, xoza û bawerîye de polîtîkayê şerî giran kenê. Ewro bi desan cinî Tirkîya û Kurdistan de yenê qetilkerdiş. Her çend ke sebeb zaf eşkera bibo zî muhakeme netîceyê ke yenê pawitiş nêdana. Botan de mabenê cinîyan de şuxulnayîşê madeyê tîryakî zêde bîyo. Bi desan ciwan raşteyan de seba madeyê tîryakî yenê qetilkerdiş. Bi desan ciwanî tîryak vera zirar danê keye û dormeyê xo. No demêk dergo ke na polîtîka dewre de ya.”

 

‘Her cayê Kurdistanî de polîtîkaya şerê taybetî’ 

 

Zîlane qiseykerdişê xo wina dewam kerd: “Xozaye ser de zî talan babeta vatişî ya. Darî yenê birnayîş. Her roje bi kamyonan darî Cudî û Gabarî de yenê birnayîş û şirawîyenê metropolanê Tirkîya. Ewro Kurdistan de her ca de polîtîkayê şerê taybet dewam keno. Her çar parçeyê Kurdistanî de polîtîkayê şerê taybet yeno ciwîyayîş. Ê tewr giran zî Tirkîya de yeno ciwîyayîş. Bi desan kurdî yenê qetilkerdiş.” 

 

Zîlane qiseykerdişê xo yê peyênan de bale ant serê tecrîdî û da zanayîş ke bi tecrîdî reyde hewl danê sere de cinîyan û heme şarê kurdî asîmîle bikerêû ercnayîşê xo wina qedêna: “No şerêk sîstematîk o. polîtîkayê şerê taybet yenê rayîr ra berdiş. Cizîr de Medreseya Sûre dayî Weqfê Hayratî. Medreseya Meleyê Cizîrî ke tede wendo dayî Weqfa Hayratî. Muracatê şarî zî qedexe kerdî. Bi no hawa wazenê komelî çinî bikerê û bihelnê. Binê nameyê îslamîyetî de şar asîmîle kenê.”