Zelal Tunç

 

WAN - Sekretera Temsîlkarîya THÎVî ya Wanî Sevîm Çîçeka ke bi bahaneyê ‘qedexeyê bernameyan’ ya walîtîya bajarî tewrê eşkerayî bîbî û dimayê mudaxaleyê polîsan ameybî muhakemekerdiş, berat kerd. Sevîme da zanayîş ke hemverê bêhuqûqîyan do têkoşîn dewam bikero. 

 

Tirkîya û Kurdistan de serra 2016î de badê îlankerdişê OHALî Amîrê Mulkî û polîsî bi hawayêkê kêfî ‘rayîr ra şîyayîş, çalakî û aktîvîteyan’ asteng û qedexe kerdî. Kesê ke nê heqê xo şuxulnayî zî bi dewayan reyde ameyî rî bi rî. Hetê Walîtîyan ra no 6 serrî yo bê bahane qedexe ameyî ronayîş û raşteyê ke destur dayî zî hetê polîsan ra girîyayî binê abluqa.

 

Sekretera Temsîlkarîya Weqfê Heqanê Merdiman a Tirkîya (THÎV) ya Wanî Sevîm Çîçeke derheqê babete de ajansê ma rê qisey kerd. 

 

Sevîme da zanayîş ke rewşa ke sey suc ameya pêşkêşkerdiş û bîya sebebê muhakemekerdişî, esasê xo de şuxulnayîşê heqê desturê esasî yo û wina dewam kerd: “Tirkîya de caardişê ke sey nê yewna caardişêk çin o dewre de yo. Wan de her çend ke 6 serrî yo bi desan reyan walîtî bibedelîyo zî sey adetêk qerarê qedexeyî dewam keno. Bi nê qerarê qedexeyî ke ameyî girewtiş hemwelatijî nêeşkenê tu heqê xo yê demokratîke bişuxulno. Destur nêdanê ke heqê dayîşê eşkerayî û rêxistinbîyayîşî pê bêro. No qerarê qedexeyî seba her kesî nîyo tena seba tay kesan o. Kesê ke rexne kenê, kesê ke muxalîf ê û temsîlkarê partîyê siyasî yê 6 serrî yo nêeşkenê bernameyan pê bîyarî. La îqtîdar derheqê xebata xo de tu astengî nêkerdêne.”

 

‘No caardişêk kêfî yo’ 

 

Sevîme heto bîn de dîyar kerd ke mîlyonêk û nîm hemwelatijî no 6 serrî yo nêeşkenê heqanê xo yê tewr esasî ra fêde bigîrê û rewşêke winasî Tirkîya de nêameya ciwîyayîş. Sevîme nê çîyan ard ziwan: “Yewîya Odeya Tabîbanê Tirkan (TTOM) pêroyê dinya de do na eşkerayîye bidayêne. Seba meslektaşêk de dinyaya xo bedilnabî do eşkerayî biameyêne dayîş. La Wan de destur nêdîya. Kesê ke ameyî eşkerayî, ameyî destbendkerdiş. Eşkerayî ame astengkerdiş. Tena Wan de bi hawayêkêkêfî ame astengkerdiş.”

 

‘Ma vera bêhuqûqîye de têkoşîn danê’ 

 

Sevîme dewamê qiseykerdişê xo de ard ziwan ke vera destbendkerdişan waştî ke çalakî pê bîyarî la no zî ame astengkerdiş û mudaxaleyê înan kerdî û wina dewam kerd: “Mi bi derbkerdiş destbend kerdî. Dimayê destbendkerdişî dewa ame akerdiş. Ma tewrê heme roniştişan bîyî. Na dewa ma ra muhîmêr bî. Çike ma tu suc nêkerd. Ma heqê xo yê rayîr ra şîyayîşî şuxulna. Rêxistinê huqûq, STK û rêxistinê demokratîke paştî dayî ma. Erey bibo zî qerarêk ke vanê nêhuqûqî yo ame dayîş. No muhîm o.” 

 

Sevîme qiseykerdişê xo yê peyênan de vat: “Prosesê peynî de her cayê welatî açarîyayo îşkencexaneyî. Muhakeme zî xoser tênêgêrena, caardişê kêfî yê welatî dewam kenê.”