Habîbe Eren

 

BURSA - Komeleya Paştîdayîş û Hetkarîya Cinîyan a Taxa Barişî seba ke bikarardiş kêm bikerê û paştîdayîş bidê mektebê herêma erdlerzî ke yenê viraştiş, bi cinîyan reyde tezgahê kelepulanê kehenan akerde. 

 

Komeleya Paştîdayîş û Hetkarîya Cinîyan a Taxa Barişî ya qezaya Nîluferî ya Bursaye seba ke bikarardiş kêm bikerê û paştîdayîş bidî mektebê herêma erdlerzî ke yenê viraştiş, bi cinîyan reyde tezgahê kelepulanê kehenan akerde. Taxe de 80 tezganî ameyî akerdiş û kelepulê ke uca de yenê rotiş ameyoxê înan seba mektebê ke şaredarîya Nîluferî Samandagi ya Hatayî de di viraza bêra şirawitiş. 

 

Keyaya taxe Bariş Sevîlay Karacaye da zanayîş ke yew amacê înan no yo ke bale biancê serê krîzê globalî û wina vat: “No problemo muhîm ê dinya yo. Eynî wext de bi hawayêkê zaf zêde herînayîş û dayîş yeno kerdiş. Ma waşt vernîya nê çîyî bêra girewtiş ma organîzasyonêk winasî viraşt. Amacê ma yê diyîne zî no yo ke pereyo ke tîya de bêro qezenckerdiş do seba mektebo ke şaredarîya Nîluferî Samandagî de viraza bêro şirawitiş.”

 

‘Başî kam ca de bibo ma do uca de bê’ 

 

Sevîlaye dîyar kerd ke her kes eleqe û reaksîyonê pozîtîf vîneno û merdim dîyar kenê ke ganî kelepulê kehenî zêde bêrî rotiş û wina qiseykerdişê xo dewam kerd: “Derheqê nê çîyî de waştişê ma esto. Ma do bi projeyê bînan bi komeleya xo reyde hetkarîyê xo seba keye û komê wayîrê lazimîyan pê bîyarê. Başî kam ca de bibo ma do uca de bê.” 

 

‘Wazenê kelepulanê kehenan biercnê’ 

 

Sevîlaye qiseykerdişê xo wina peynî kerd û vat: “Qezaya Nîluferî goreyê qezayanê bînan yê Bursaye rewşa înan a ekonomîye hîna baş a. Coka ra vatêne do kes uca de kinc û kelepulanê kehenan nêgîro, eleqe nêvîno. La ma wina nêfikirîyenê. Krîzê ekonomî her ke şino giran beno. Êdî her kes tesîr beno. Her kes wazeno nê çîyî hetê ekonomîye ra biercno. Kelepulê kehen yê keyeyê xo wazenê biercnê. Ma badê erdlerzî hetkarîya kincan kerd. La hema hemwelatijê erdlerzî yê ke lazimîya înan bi hetkarîye esta, estê. Ma timî hetkarîya îna kenê. No organîzasyon zî înan ra yew o.”