ŞIRNEX - Cinîyan derheqê polîtîkayê şerê taybet yê Cizîrî de ercnayîş kerd. Cinîyan wina vat: “Ma bêwayîr nîyê. Serekê ma tepişte yo. Coka ra ma nê çîyan ciwîyenê. Kurdî hedef yenê girewtiş. Wazenê çinî bikerê. Wazenê ziwanê ma, heqanê ma çinî bikerê. Heta ke îxanet mîyanê ma de bibo do wina dewam bikero.” 

 

Yew cayê ke polîtîkayê şerê taybet tede zaf yeno rayraberdiş qezaya Cizîrî ya Şirnexî ya. 14ê kanûna 2015î de qedexe ame îlankerdiş û heta 2yê Adara 2016î bi temamî 79 rojan qedexeyê tebervejîyayîşî dewam kerd. Wextê qedexeyî de hîrê reyan cêrzemînê cîyayan de 177 kes bi temamî zî 288 kes Cizîr de ameybî qetilkerdiş. Badê nê hêrişan Cizîr her tim hedef ame girewtiş û seba bedilnayîşê demografîk û kulturî polîtîkayê şerê taybet zaf eşkera yeno dîyîş. Cinîyê cizîrijî mîkrofonê ma rê qisey kerd û qala polîtîkayê şerê taybet kerdî. Destdergîye ra bigîrê heta tacîz, îstîsmarê tutan, qetilkerdişê cinîyan, ajantî, rayîrravetiş her tewirê polîtîkayê şerê taybet Cizîr de yeno rayraberdiş. Raşteyê Cizîrî de tesîrê polîtîkayê şerê taybet zaf eşkera yeno dîyîş. Cinîyê taxe mîkrofonê ma rê qala her tewirê polîtîkayê şerê taybet kerdî. 

 

Leşker û polîs cinîyanê tîya cahil vînenê 

 

Şîlan Aybîya ke karkera ciwan a derheqê babete de wina vat: “Tutê kênayî binê teda de yê. Ma azad nînê pîlkerdiş. Kurdbîyayîş, keyeyêk kurd de ciwîyayîş weş o. Tena problemê ma sînorkerdiş û astengî yo. No her ke şino gird beno. Tîya cayêk şenik o. Merdim çîyan lez museno. Tutê kênayî lez yenê xapênayîş. Leşker û polîsî cinîyê tîya cahil vînenê. Coka ra hedîseyê destdergî û îstîsmarî yenê ciwîyayîş. Wexto ke bena şewe wesayîtî raşteyan de gêrenê. Wazenê cinîyan bigîrê wesayît. Ganî her cinî xo bipawa, biba wayîrê fikrî.” 

 

Wa aştî pê bêra 

 

Fehîme Topçu: Ma her roje dua kenê ke aştî pê bêra. Ma seba tepişteyan dua kenê. Ma feqîr ê, nêeşkenê hetkarî bidî înan. Merdimêk mi 35 serrî yo tepişte yo. Tehlîyekerdişê ci her tim taloq kenê. Ma hîssin ê, la çîyêk destê ma ra nîno. Waştişê ma no yo ke aştî pê bêra.

 

 ‘Ganî cinî bêveng nêmanê’ 

 

Wendekare Fatma Okuşluke: Merdim nêeşkeno rayîr ra şêro. Ez kehweyan nêrehet vînena. Ez mecbur manena rayîrê xo bibedilna. Ewnîyayîşê camêrdan mi aciz keno. Tîya de hedîseyê ke yenê ciwîyayîş vera her tim tay çîyî yenê nimitiş. No raşt nîyo. Ganî cinî rewşê tacîz û destdergîye de bêveng nêmanê û gerre bikerê. Ganî cinî bêveng nêmana. Heto bîn de ganî ma vera zîndanan de bêveng nêmanê. Zîndanan de her çî bi destê dewlete yeno kerdiş. Şîdet çareserî nêano. 

 

 Hedîseyê destdergîye yenê normalkerdiş 

 

Kedkara keyeyî ya ciwane Sîbel Kuçkune: Colemêrg de hedîseyê destdergîye ameyî ciwîyayîş. Êdî keye tersenê ke tutê xo bişirawê unîversîte zî. Ma cayêk bîn de nêewtanenê vajî ke ma kurd ê. Çike ma yenê qetilkerdiş. Ma nêewtanenê tutanê xo bierşawê raşteyan zî. Bawerîya ma çin a. No çî êdî normal yeno dîyîş. La ganî normal nêro dîyîş. Destdergî normal kenê. Ganî ma vera nê caardişan de wirzî payan ser. Hetê polîsan ra hedîseyê winasî zaf pê yenê. Ganî ma normalbîyayîşê înan hedîseyan qebul nêkerê û reaksîyon bimojnê. 

 

Leşkerî ma rehet nêverdenê, her tim hêriş kenê 

 

Kedkara keyeyî Emîne Karataye: Ma binê îşkenceyî de yê. Tutê ma seba xebate şinê Iraq. Şewêk verê cû nuqtaya leşkerî ya Sîlopî de ame tepiştiş. Kaçaxvanîye ra ame destbendkerdiş û tepiştiş. Lajê mi hema 18 serrî nîyo. Leşker hêrişê ma kenê. Ma rehet nêverdenê. Nêverdenê ma keyeyê xo de zî rehet bibê. 

 

Cizîr bêwayîrî ver ame na rewşe 

 

Emîne Dalmiş: Cizîr de her çî esto. Merg, qetilkerdiş, destdergî, her çî esto. Cizîrê ma bêwayîr mend. Her kes sere çewt keno. Her kes goreyê xo têgêreno. Polîsî ma rehet nêverdenê, aciz kenê. Gazê îsotî erzenê ma ser. Her çî tîya de yeno ciwîyayîş. Ganî her kes vera nê caardişan de vengê xo berz bikero. 

 

Serekê ma tepişte yo, coka ra ma nê çîyan ciwîyenê 

 

Kedkara keyeyî Zeynep Yildirime: Ma bêwayîr nîyî. Serekê ma tepişte yo. Coka ra ma nê çîyan ciwîyenê. Kurdî hedef yenê girewtiş. Wazenê çinî bikerê. Wazenê ziwanê ma, heqanê ma çinî bikerê. Heta ke îxanet mîyanê ma de bibo do wina dewam bikero. Vera nê caardişan de ganî ma bibî yew. 

 

Ez Barzanî lanet kena 

 

Dadîya Mehmet Tunçî, Esmer Tunçe: Di roje verê cû serrgêra qetilkerdişê Jîna Emînîye bî. Serê cinî û Kurdan de tedayê zaf estê. Ma wayê Jîna, Berîtane û Zîlane yê. Ma dadîyê ke qesebaya înan vêşayê. No zilm do heta kêy dewam bikero? Ma zî wazenê sey merdimî biciwîyê. Wa qesebaya dadîyan nêvêşa. Tutê ma se kerdî? Çîyêk xirab nêkerdî, dizî nêkerdî. Tutanê ma tepişenê û cezaya muebetî danê. Ez Barzanî lanet kena. Wa xo rê nêvajo ez kurd a. Kurdistan teslîmê Erdoganî keno. Barzanî embazê Erdoganî yo.