AMED - Merasîmê yadkerdişê Apê Mûsa de lajê ey Dîcle Anterî qisey kerd û wina vat: “Bawo, rehet be. Generalê to yê qijî qelema to erd de nêverdayî û ê darê çinarî pîl bîyê.” 

 

Roşnvîr, rojnameger û nuştoxo kurd Mûsa Anterî 20ê êlule 1992 de hetê endamê JÎTEMî ra kuçeyê 442yîne ê Taxa Cumhuriyetî ya Semtê Seyrantepe yê qezaya Yenîşehîrê Amedî de ame qetilkerdiş. Mûsa Anter, bi serkêşîya Platformê Rojnamegeranê Cinîyan ê Mezopotamyayî (MKGP) û Komeleya Rojnamegeran ê Dîcle Firatî (DFG) û bi tewrbîyayîşê lajê Mûsa Anter, Dîcle Anterî, nuştoxê Yenî Yaşamî Huseyîn Aykol, Hemserekê Partîya Herêmanê Demokratîke (DBP) ê Amedî Hayrettîn Altûn, Hemserekê Partîya Çep a Keske yê Amedî Abbas Şahîn, parlamenterê Partîya Çep a Keske ya Amedî Ceylan Akça û Mehmet Kamaç, endamê Komeleya Heqê Merdiman (ÎHD), temsîlkarê sazgehê komelê sivîlî yê Amedî û xeylêk rojnamegerî yad kerdî. Yadkerdiş de fotografê Mûsa Anterî û rojnamegerê ke amebî qetilkerdiş, ameyî wedaritiş. Polîsan destûr nêdayî ke fotografê rojnameger Ferhat Tepe û Yilmaz Yakut ke ameyî qetilkerdiş bêrê berzkerdiş. Yadkerdiş bi deqeyêk rêzgirewtişî dest pêkerd. 

 

Eşkerayîye de vernê de Verfeka MKGPyî Roza Metîna qisey kerd. Roza sere de Mûsa Anterî yad kerd û vat: “Pêwa pêro tedayan zî Apê Mûsa fek rojnamegerîye ra vera nêda. Apê Mûsa bi qelema xo têkoşînêk pîl da. Ma do her tim qelema ci bigîrê û fek ci ra vera nêdê. Ma do her şert û mercan de mîrasê Apê Mûsa bipawê. Na dewlete de polîtîkayê bêcezakerdişî estê. Versûcê Apê Mûsa nêameyî cezakerdiş.”

 

Dima ra rojnameger Huseyîn Aykol qisey kerd û wina vat: “Apê Mûsayo delal; mi par tîya de raporêk pêşkêş kerd û roja ke şima ameyî qetilkerdiş heta nika ma rojname vet û televîzyonê ma yê herêmî virazîyayî. Yê ke şima bi hovane qetil kerd, vatêne qey ma do fek vera bidê. Labelê ma do beyraqa to berz bikerê.” 

  

Lajê Mûsa Anterî, Dîcle Anterî zî wesiyetê pîyê xo ard vîr û wina vat: “Ewro ma vînenê generalê qijî yê Apê Mûsa, qelema ci ya amebî şikinayîş reyke bîn temîr kerdê, bi destê xo girewtê û rayîrê ci dewam kenê. Na qeleme qetî nêşikina.”

 

Parlamenterê Partiya Çep a Kesk yê Amedî Mehmet Kamaç zî Mûsa Anterî yad kerd û wina vat: “Apê Mûsa, apê şarê kurdî yo, tu wext nîno xovîrrakerdiş û o nameyê xoverdayîşî yo. Rayîrê ci rayîrê xoverdayîşî yo.”

 

Dimayê qiseykerdişan, girseyî sloganê “Çapemeniya azad nîna bêvengkerdiş" û “Şehîdî nêmirenê” berz kerdî û ver bi cayê Mûsa Anterî ke amebi qetilkerdiş rayîr ra şîyî. Beşdaran, qerenfîl dayî cayê ke Mûsa Anter ci de amebi qetilkerdiş û merasîmê yadkerdişî peynî bî.