Zelal Tunç

 

WAN - Bi hemkarîya partîyê "Îslamo Siyasî" kesê ke şîdet bi cinîyan kenê yenê pawitiş. Temsîlkara Serekîya Pêroyî ya PÎAyî Menîce Gulmeze derheqê babete de da zanayîş ke binê nameyê îslamî de partîya cinîyan gecilnenê û vat: “Do vera îslamo siyasî de têkoşînê ma dewam bikero.” 

 

Kurdistan û Tirkîya de bi destê dewlete yeno waştiş ke destkewtişê cinîyan bêrê çinîkerdiş. Yeno waştiş ke cinî teberê komelî de bêra verdayîş. Weçînayîşê peyênan yê serra 2023yî de AKP-MHP, HUDA-PAR û Partîya Refaho Newe destkewtişê reyna kerd hedef. Vatişê partîyê ‘Îslamo siyasî’ yê vera xebetîyayîşê cinîyan, têkoşînê înan reyna bî rojeve. Binê nameyê îslamî de cinî reyna bî hedef. Temsîlkara Serekatîya Pêroyî (PÎA) Menîce Gulmeze derheqê babete de ercnayîş kerd. 

 

'Wazenê rantê siyasî bi dest bifînê' 

 

Menîceye da zanayîş ke seba rantê siyasî hêrişê destkewtişê cinîyan kenê û wina vat: “Vatişê partîyê Îslamo Siyasî yê meclîsî seba zeyîfkerdişê polîtîkayê derheqê cinîyan o. bi vatiş û aktîvîteyanê xo hêrişê cinîyan kenê. Bi vatiş û aktîvîteyanê xo yê hemverê cinîyan wazenê rantê siyasî bi dest bifînê. Nê kesî hêrişê kesê ke destkewtişê cinîyan pawenê kenê. Bi no hawa wazenê mîyanê xo de raşteyêk cinîyan rê awan bikerê. Bi no hawa wazenê vatişê xo serê têgêrayîşê cinîyan, dezgehê cinîyan, cinîyê ke têkoşînê cinîyan rayîr ra benê de ferz bikerê.”

 

'Kerdoxan bi efuyan serbest verdenê’ 

 

Menîceye dîyar kerd ke bi qanûnê înfazî ke yeno vetiş cezaya kesê ke kiştişê cinîyan de rol kay kerdî fînenê di serran û wina vat: “Wexto ke îqtîdar serê îqtîdarîye de bî bi qanûnê efuye maddeyê derheqê kerdoxê cînayetê cinîyan bedilna û kerd dewre. Coka ra zî şîdet û cînayet zêde bîyo. Bi qanûnê ke vetî kiştoxan serbest verdenê. Kesê ke fikirîyenê kenê zîndan la kiştoxan serbet verdenê. Coka ra zî welat de tecawuz, şîdet, cînayet, îstismar timî rojeve de yo. Ganî seba kesê ke nê sucan kenê qanûnê giran bêrê vetiş la eksê ci nê kesî yenê pawitiş û serbestverdayîş.”

 

'Ê zî vatişanê xo ra bawer nêkenê’ 

 

Menîceye vatişê HUDA-PARî yê ‘wa cinî keye de biewna tutan’ şermezar kerd û vat: “Ê daxî nê vatişanê xo ca nêanê. Ê zî vatişanê xo ra bawer nêkenê. Madem vanê wa cinî keye de ronişa qey kênayê xo danê wendiş? Cinîyê înan qey xebetîyenê? Seba ke siyaset de qezenc bikerê qey cinîyan şirawenê seha? Qey partîya înan de milê cinîyan abeno? Qey mîtîngê xo de cinîyan şixulnenê? Nê vatişê ke seba cinîyan vanê, tena seba kesê ke sey înan nîyî vanê. Kênayê înan benê doktor, camêrdan reyde eynî amelîyatxane de kewenê amelîyat. Yan zî bi mamosteyê camêrdî reyde eynî oda pare kenê. Cinîyê înan yê ke camêrdana reyde xebetîyenê estê. Çîyê ke seba xo nêkenê qey komelî rê ferz kenê?”

 

'Ganî tu cinîyêk înan vera fek destkewtişanê xo ra vera nêda’ 

 

Menîceye ard ziwan ke vatiş û hêrişê hemverê cinîyan ke yenê kerdiş bi xo îslamîyet de cayê xo nêgînê û wina vat: “Çike Hz. Hatice tuccar bî û camêrdan reyde bazirganî kerdêne. Hz. Ayşe ders dayêne camêrdan. Cinîyê şervan estbî. Cinîyê ke camêrdan reyde şer kerdêne estbî. Cinîyê ke na babete de bîyêne leheng estbî. Cinîyê ke bîyêne babeta destanan estbî. Cinîyê ke bi camêrdan reyde hicret kerdêne estbî. Cinîyê zabita estbî. Bi hemkarîya partîyê 'Îslama Siyasî', binê nameyê îslamî de partîya cinîyan gecilnenê. Beno ke nimuneyo ke bimojnî Îslama Emevîyan bo. Yan zî beno ke tay cemaetê ke 50 serrî verê cû vatêne wa cinî nêveja teber bo. Bi nê zîhnîyeto teng cinîyan mîyanê dêsan de heps kenê. Ganî tu cinîyêk înan vatişan vera fek destkewtişanê xo ra vera nêda.”

 

'Seba ke vernîya cinîyan nêakerê do her tim mudaxale bikerê' 

 

Menîceye dîyar kerd ke welato ke bi zîhnîyetê kehnî yê adetî yeno rayraberdiş de her tim mudaxaleyê cinîyan yeno kerdiş û wina dewam kerd: "Zîhnîyetê camêrdî seba ke vernîya cinîyan nêra akerdiş her çîyî keno. Her raşteyî de astengkerdişê înan vejîyeno vernîya ma. Bi taybetî partîyê ke nê welatî rayra benê wayîrê nê fikrî yê. Wayîrê fikrê kehnî yê Rojhelatê Mîyanenî yê. Seba xo nêwazenê cinî raşteyê siyasî de xurt biba. Camêrd nêwazeno têduştîya camêrd û cinîye biba.”

 

'Pîrozbîyayîşê cinîyan ardişê dinya yê tutan ra nîno’ 

 

“Pîrozbîyayîşê cinîyan bi ardişê dinya yê tutan ra pê nîno. Tutê Hz. Ayşe çinî bî. Ma aye pîroz nêbî? Pîrozbîyayîşê cinîyan ardişê dinya yê tutan ra nîno. Pawitişê keyeyî qaseyo ke wezîfeyê cinîyan o hende zî wezîfeyê camêrdan o. Do camêrd teber de bibo, mîyanê siyasetî de bo la cinî keye de bêra sînorkerdiş. No çî nîno qebulkerdiş.”