Şehrîban Aslan

 

AMED - Azîze Ekere emrê ci yê qijî de bê xebera aye hetê keyeyê xo ra yena zewecnayîş. Azîzeye dîyar kerd ke qet rehetî nêdîya û bi 6 tutanê xo reyde têkoşînê cuye dana. 

 

Cinîyê ke her roje bi tedayan reyde yenê rî bi rî Kurdistan de hem bi tedayê camêrdî û hem zî bi tedayê dewlete reyde yenê rî bi rî. Azîze Ekere ya 47 serrî qezaya Farqînî ya Amedî de ciwîyena û serra 1993yî ra heta nika têkoşînê cuye dana. Azîzeye emrê xo yê qije de hetê keyeyê xo ra yena zewecnayîş. Azîze zewacê xo ra dima hetê mêrdeyê xo û hetê keyeyê mêrdeyê xo ra raştê şîdetê sîstematêk yena û bi tena sereyê xo vera şîdetî de têkoşîn dana. 

 

Bi tehdîdê do bêra qetilkerdiş ameye zewecnayîş 

 

Azîze dîyar kerd ke hema qijbîya pîyê aye dinyaya xo bedilneno û dadîya aye bi tena sereyê xo 7 tutan rê miqate bena. Azîze wina vat: “Dadîya mi mîyanê şertê zehmetinan de ma miqateyê ma bî. Birayê mi 24 serrî bî hetê hîzbulahî ra ame qetilkerdiş. Nê prosesî de waştî ke mi lajê datê mi yê zewecnaye û wayîrê tutan reyde bizewecnê. Mi red kerd. Na reye mi seba torinê datê mi waştî. Ez a şewe keye de nêbîya. Ez serê sibayî ameya, gîştane kerdî gişta mi. Xebera mi çinî bî. Mi se kerd zî mi goşdarî nêkerdî. Vatî ti gîştane bierza ma to kişenê.”

 

‘Mi nêzanayêne zewac çi yo’ 

 

Azîze dîyar kerd ke 6 aşman mîyan de ameya zewecnayîş û dewa Boştî ya Farqînî ra ameya Amed û wina vat: “Ez zaf şenik bîya. Mi bêrîya dadîya xo kerdêne. Bado ke birayê mi ame qetilkerdiş xora psîkolojîyê mi xeripîya. 6 aşmê mi qedîya ez digane menda. Hîrê tutê mi virazîyayî. Mêrdeyê mi nêxebetîyayêne. Dima ra zî kaçax bî. Kewt zîndan. Yew serr û nîme zîndan de mend. Ez şîyêne pakîya keyeyan û mi wina tutanê xo pîl kerd. Nêweşîya tansîyon û şekirî mi de virazîya.”

 

‘Bi tutanê xo reyde ameye tepiştiş’ 

 

Azîze wina dewam kerd: “Mêrdeyê mi timî ameyêne tepiştiş. Bado ke serbest ame verdayîş şî Kibris. Ez û 5 tutê xo zî şîyî. Ma 3 serrî uca de mendî. Ma pê nêkerd û krîzê ekonomîye vera agêrayî. Rayîrê agêrayîşî de gerreyê ma kerdî. Ez û tutê xo ma ameyî destbendkerdiş. Di kênayê mi yê pîl û bebika mi kişta mi nezaretxane de mendî. Hîrê tutê mi dîyayî yurd. Venga keso ke ma bi kaçaxî berdbî kerdî. Dima ra ma bi nê kesî reyde serbest verdayî. Ma vat ma berd pansîyonêk la o ma berd keyeyêk mafyayî. Ma di hewte uca de mendî û dima ra derbazê pansîyonî bîyî. Ma 15 rojan nê pansîyonî de mendî. Rayîr de kesêk mêrdînij ma dî û hetkarîya ma kerd. Min û tutê mi berd keyeyê kesêk amedij. Ma mecbur mendî şêrê. Ez zaf înan rê sipasdar a. Dima ra karê huqûqî qedîya û desturê şîyayîşê ma yê Tirkîya vejîya. Ma bi keştîye şîyî Mêrsîn. Uca ra ma ameyî Amed. Kesêk hetkarîya ma nêkerd.” 

 

Azîze qiseykerdişê xo wina qedênaye: “Mi xo rê kar dî. Ma tay xo kerd nîzam. Şar zaf hetkarîya ma kerd. Ez înan rê sipas kena. Dimayê ci erdlerz qewimîya. Keyeyê mi rijîya. Ez nika konteynir de manena. Her çend ke problem bibî zî nika cayêk ke ma tede manenê esto. Kîra zaf vaye ya. Vera heme çîyan ma pay ser de yê.”