Melek Avci

 

ANQARA - Zerrîwaza EŞÎKî Ozgul Kaplan û avûkate Merve Çîftçî Davrane dîyar kerdî ke eke meclîs abibo do qanûnê derheqê xespkerdişê heqan bêrî vernîya înan û vatî ke ganî vera tehlukeyan de her tim hadre bê. 

 

Wezîra Xizmetê Keye û Komelî Mahînur Ozdemîr Goktaşî 26ê Temmuze de eşkerayîya ke da de dîyar kerd ke do heqê nefeqeyî bêro sînorkerdiş û qanûnê ê munaqaşayî rê bêro akerdiş. Werîzê Edaletî Yilmaz Tunçî zî paştî dabî ê vatişan. 

 

Aşma teşrîna verêne de do meclîs bêro akerdiş û do Qanûnê Medenî newe ra bêro destgirewtiş. Zerrîwaza Platformê Cinîyan ê Seba Seyyewbînanîye (EŞÎK) Ozgul Kaplan û avûkat Merve Çîftçî Davrane hetê huqûqî û xespkerdişê heqan ercna. 

 

Ozgule dîyar kerd ke aşma teşrîna verêne de beno ke qanûnê ke vanê meclîsî ra derbaz bibê û wina vat: “Sey Afganîstan û Îranî hema yew reyêk de ma do nêkewê prosesêk ke heqê cinîyan yeno çinîkerdiş, la do seba nê çîyî gamî bêrê eştiş. Ma bi serran nîyetê înan vat. No îqtîdar wina ewnîyeno heqê cinîyan û heqê seyyewbînanîye. Hêrişê tewr cidî yê hemverê Qanûnê Medenî qanûnê miftîtîye yê serra 2017î bî. La hetê muxalîf nê çîyî cîdî nêgirewt. Çarçeweya azadîya terzê cuya dînî de ame destgirewtiş. La dimayê ci her çî yew bi yew dîyî.”

 

‘Heme cinîyî tehluke hîs kenê’ 

 

Ozgule da zanayîş ke heme cinîyî tehlukeyo ke do bêro hîs kenê û dewam kerd: “Babete xeylê cîdî ya. Ma her kes nê çîyî nêvîneno? Qet şik çin o ke vînenê û bi hawayêkê balkêş mesajê ma veng nêdano. Ma vanê hedefê ma yê esasî Qanûnê Medenî yo. Goreyê mi aşma teşrîna verêne do prosesî peynî bikera. Qaseyo ke ma vînenê, na gama peynî ya. Ganî vera nê de ma heme hêzê xo ronê raşte. Ez bawer kena ke heme cinî nê çîyî sey tehluke vînenê. Coka ra her çî wina asan nîyo. Ganî bi nê zîhnîyetê cinîyan têbigêrê.” 

 

Xeylê babetan de wezîfe dayî Dîyanetî 

 

Ozgule dewamê qiseykerdişê xo de nê çîyan ard ziwan: “Vanê ke no barê muhakemeyî şenik keno. Gelo karê muhakemeyî tena dewayê ferverdayîşî yo. Bi mîlyonan dewayê bazirganîye estê. Tu eleqeyê muhakemeyî bi nê çîyî çin o. Wazenê îstîhdamê meleyan rê raşte akerê. La bi nê çîyî sînor nêmanenê. Karê komel û huqûqê keyeyî zî wazenê bidê dîyanetî û dîyanetî reyde girê bidê. Raşte raşt nê çîyî wazenê. Cinî tewrê tutanê xo eşkenê hema şewêk de bikewê pey beran. La ma vanê ke heta ke seyyewbînanî nêra nefeqe nêeşkeno bêro cipersayîş. Ganî ma vera nê hêrişan de her tim hadre bê.”

 

'Bi mabenviraştişî do kontrol senî pê bêro?' 

 

Avûkate Merve Çîftçî Davrane zî ard ziwan ke no hêrişêk newe nîyo û ge-ge Qanûnê Medenî anê rojeve û vat ke no mudaxaleyê vera seyyewbînanî û laîkîbîyayîşî yo. Merveye dewamê qiseykerdişê xo de vat: “Fekveradayîşî ra bigêrêne heta rejîmê mal, tasfîyekerdiş, malê ke prosesê zewacî de ameyî girewtiş, heta welayetê tutan ê ke Qanûnê Medenî de ca gênê do bi mabenviraştişî bêrê destfînayîş. Mabenviraştiş çi yo, ez zî mabenviraştox a, wirdî hetan venga ofîsê xo kena. No proses bi temamî nimite yo. Xo paweno îradeyê hetan. Esasê metodan ra yew zî nimitiş o. no metod beno sebebê huqûqê zaf hetin. Seba tutan zî êdî nêwazenê nefeqe bêro dayîş. Vera hêrişan de ganî ma alarm de bê. Ganî ma her çîyî rê hadre bê.”