MERKEZÊ XEBERAN - Festîvala Govende ya 6ine ya Şehîd Ronahî Bawer 16ê êlule de Rimêlanî bêro organîzekerdiş. Festîvale do 4 rojan dewam bikera.

 

Festîvala Govende ya 6ine ya Şehîd Ronahî Bawer ke serra 2015ine de dest pêkerd, do bajarê Rimêlan ê Vakur û Rojhelatê Sûrîye, mabêne 16-20ê êlule de bêro organîzekerdiş. Festîvale de komê muzîkî zî do bikewê serê sehne û govendê kulturî yê şarê Vakur û Rojhelatê Sûrîye zî do bêrê pêşkêşkerdiş.

 

Yew endama Komîteyê Amadekar a Festîvale Evîn Bîlal ANFî rê qisey kerd û vat: "Ma serra 2015ine û nata bi konseptêk ke rengê pêro pêameyîşê pêroyî yê Vakur û Rojhelatê Sûrîye ci de ca gêno, na festîvale organîze kenê. Seba hêrişê hemverê Rojawanî, festîvale mabêne serranê 2019-2021ine de nêame organîzekerdiş. Festîvale 5ine serra 2021ine de Hesekê de ame organîzekerdiş. Festîvala 6ine zî ma do Rimêlanê organîze bikerê.”

 

Evîn Bîlal derheqê muhtewa û amadekarîyê festîvale de agahî da û vat: “Festîvala ma seke kulturêk mîyanê komelî de cayê xo girewta. Hetê Komîteyê Kultur û Hunerî, Hîlala Zêrîn û Tevgerê TEV-ÇANDî ra seba festîvale amadekarîyê xurt estê. Festîvala ke ma do emserr organîze bikerê de seba Jîna Emînî û kesê ke dorê sloganê ‘Jin, Jiyan, Azadî’ yê Îran-Rojhelatê Kurdistanî bîyê yew do mesajê pêgirewtişî zî bêro dayîş. Nêzdî 4 aşmî yo ma amadekarîyê festîvale kenê. 21 komunê govende yê kurd, ereb, asûrî, suryanî û armenîyê Vakur û Rojhelatê Sûrîye do tewrê festîvale bibê. Eynî wextî de do komê muzîk û hunerî zî festîvale de ca bigîrê.”