Dilûcan Bozî

 

KOBANÊ - Endama Koordînasyonê Kongreya Starî ya Herêma Firatî Macîde Hesûne dîyar kerd ke herême de polîtîkayê qirkerdişê bi her hawayî yenê kerdene û vat: "Nika dewleta îşxalkerdoxe hûmarêka pîl ê çeteyan derbazê herêman kena û perwerde kena. Nê çeteyî îhlalê heqan kenê."

 

Dimayê ke herêmê sey Efrîn, Serêkanî, Girê Spî, Bab, Izaz û Cerablos ame îşxalkerdene, êdî ciwîyayîş nê herêman de açerya wareyê kiştene, remnayene, tecawîzkerdene, talankerdene, diznayîş û rotene. Xozaya herême xira kerdî û şarê uca koçber bî. Vera koçberan zî keyeyan de çeteyî ameyî bicakerdene. Hetê dewletê îşxalkerde ra mîyanê komelî de torra fuhuşî yena averberdene. Derheqê babete de Endama Koordînasyona Kongreya Star ya Herêma Firatî Macîde Hesûne ajansê ma rê qisey kerd.

 

'Kerdişê bêehlaqî yenê kerdene'

 

Macîde, destpêkê qiseykerdişê xo de qalê polîtîkayê qirkerdişî kerd û vat: "Polîtîkayê ke nika dewleta tirk û çeteyê ci herême de îşxalkerdîyê xo dewam kenê, amancê înan oyo ke kultur, ziwan, xoza û bîyayîşê şarî werte ra wedarnê. Dişmin dano dîyarkerdene ke şarê herême mîyanê tersî de bê û hemverê înan sere nêwedarnê. Roj bi roje herême de merdimî yenê qetîlkerdene. Sewbîna rojane teqîn nê herêman de yenê meydan û netîce de cinî, domanî û merdimî benê qurban. Artêşa bi nameyê Hemzat û Sultan Mûrad bi rengêko bêexlaqî hêrişê keyeyê şarî kenê û bi zor malê înan desteser kenê."

 

'Bi yewîye dir do îşxalkerdiş biqedîyo'

 

Macîde tewr peyîn wina vat: "Destpêkê şerê Girê Spî û Serêkanî de dewleta tirkî kerdişê xo yê lêşin serê şarî de kerd. No reya diyîno ke Girê Spî yeno îşxalkerdene û eynî sîyaset yeno kerdene. Hemverê nê kerdişan, lazim o ke şarê herême helwestê xo ramojno. Lazim o dewletê mîyanneteweyî zî sînorêko dewleta tirkî rono. Nika dewleta tirkî hûmarêka pîl çeteyê xo derbazê nê herêman kerda û înan perwerde kena. Nê çeteyî zî îhlalê heqan kenê. Goreyê berjiwendîyê dewleta tirkî têgeyrenê û komelî qirkerdişan ra derbaz kenê."