AMED – Hemsereka HDPyî ya Amedî Hulya Alokmen Uyanike dîyar kerd ke dewletê mîyanneteweyî seba berjewendîyê xo hemverê tecrîdî bêveng ê. Hemsereka BDPyî ya Amedî Seval Gulmeze zî dîyar kerd ke CPT raporê xo de samîmî nîyo û helwestêko dihet ramojneno.

 

Komîteyê Vernîgirewtişê Îşkenceyî (CPT) ke girêdayê Heyetê Ewropayî yo, neql kerdib ke mabêne  6-17ê gulana 2019 de serdayîşê Zîndanê Tîpê F yê Îmralî kerdê û 5ê tebaxa 2020 de zî raporê derheqê Zîndanê Îmralî de pare kerdî. CPT rapor de dîyar kerdib ke ganî Rayberê PKKyî Abdullah Ocalan û her hîrê hepsîyê bînî, bi hawayêko daîmî bi avûkatanê xo û keyeyê xo dir pêvînayîş bikerê û seba nê zî bale antibî serê ‘sîstemêko mende.’ Sewbîna CPTyî raporê xo de dîyar kerd ke ganî rejîmê tepiştişî yê Îmralî reyke bîn verê çiman ra bêro derbazkerdene. Derheqê babete de hemsereka Partîya Demokratîkî ya Şaran (HDP) ya Amedî Hulya Alokmen Uyanike û Hemsereka Partîya Herêmê Demokratîkî (DBP) ya bajarê Amedî Seval Gulmeze ercnayîş kerd.

 

‘Raporê CPT qîm nêkenê’

 

Hulya dîyar kerd ke raporê CPTyî qîm nêkenê û vat: “CPT bi hawayêko biserûber şino Îmralî qontrol keno, pêşnîyazî xo vano la ê pêşwazîyan bi ca nêano. Sazgeho ke wezîfeyê ci vernîgirewtişê îşkenceyî bo, ganî na babete de bêhîsgêr nêmano. Dîyarkerdişê raporî girîng o la tewr girîng oyo ke vurnayîşê şert û mercê Îmralî yê. Seba ke CPT eynî wextî de tecrît û îzolasyono ke Îmralî de esto tesdîq keno, sewbîna îşkenceyê mîyanê xo de zî tesdîq keno la eke seba vurnayîşê şert û mercan çîyêko nêkero o wext gerek serê helwestê CPTyî de bêro vindarnayîşî. Seba ke berpirsyarîyê ci tewr esas o ke bîyaro ca.”

 

‘Dewletê mîyanneteweyî seba berjewendîyê xo bêveng ê’

 

Hulya dîyar kerd ke ganî pêro sazgehê mîyanneteweyî nê polîtîkayê tecrîdî bivînê û wina vat: "Dewletê mîyanneteweyî tecrîdê serê Îmralî vînenê. Rastîyê kurd û Kurdistanî verê çimanê dewletê mîyanneteweyî de yo. Nê dewletî zî polîtîkayê xo serê Rojhelato Mîyanên de kenê, coka nêçareserkerdişê probleman zî nê dewletan rê sepernenê. Tena helwestê dewleta tirkî ney, eynî wextî de helwest û rolê dewletê mîyanneteweyî zî babeta Îmralî de esto û nêwazenê problemê Îmralî bêro çareserkerdene. Coka hemverê tecrîdê Îmralî de bêvengîya xo pawenê.”

 

‘CPT raporanê xo de samîmî nîyo’

 

Seval Gulmeze zî dîyar kerd ke rapor tena serê kaxidan de maneno û wina dewam kerd: “Îhlalkerdişê heqan kam kontrol keno û tesîrê raporan çend esto? Eke CPT raporê heqê îhlalkerdişî eşkera bikero û hemverê nê vurnayîşêko bi ca nêaro, o wext raporanê xo de samîmî nîyo. Gelo eşkerakerdişê raporan tecrît werte ra dareno we? Ganî ma nê çîyan biercnê. Belê raporî girîng ê la eke prosesê ameyoxî de bibo rayîrêko çareserî o wext girîng o.”

 

‘Ganî tecrîd bêro wedaritene’

 

Sevale tewr peyîn wina vat: “Dinya de tesîrê raporê CPTyî estê la ma serê cografyaya Kurdistanî de ciwîyenê, o wext no çî yeno hişê ma. Eke ma sîstemê modernîteyê kapîtalîstî rê xizmet nêkerê, o wext çi bêro sereyê ma mubah yeno vînayene. Eke ma sey înan nêfikrîyê, sey înan tênêgeyrê tu heqê ma zî nêmaneno û bi no hawa her wext heqê ma yê bingeyîn yenê îhlalkerdene. Eynî wextî de yeno waştenê ke omidê şarî zî bêro şiknayene. Sey ke yeno zanayene ke tecrît sûcêko merdimayî yo. Eke ewro CPT raporê serê nameyê sûcê merdimayî pare bikero û nê îhlalkerdişan peynî nêkero o wext helwestêko bi dihet keno.”