Rojda Seyidxan

 

QAMIŞLO - Endamê Heyva Sor a Kurdî, şaristanê Dêrikî de semedê tedbîrê vera vîrusê Koronayî verê berê nêweşxaneyî de nuqtayê kontrolkerdişî welatîyan rê awan kerdî. Endamê Heyva Sor a Kurdî, derheqê rewşa vilabîyayîş û tedbîrê hemverê vîrusê Koronayî de wina vatî: “Semedê pawitişê vîrusê Koronayî ke nêweşê, nêweşxaneyî de yê ma nê prosesî aver berd. Bi omidê her kes rewşa xo verê ma de kontrol bikero û vîrus derbazê merdimê bînan nêkero.”

 

Dimayê vilabîyayîşê vîrusê Koronayî (Covid 19) temamê dinya ke netîceyê ci de bi hezaran merdimî cuya xo vindî kerdî, tedbîrê girîng vera vilabîyayîşê ci yenê girewtene. Vakur û Rojhelatê Sûrîye de zî vîrusê Koronayî vila bibi û tehlûkeyêko pîl serê welatîyan de ard. Heyva Sor a Kurdî û heme taximê weşîye mîyanê xebatê pawitişê şarî de yê. Şarisranê Dêrikî zî semedê pawitişê cuya nêweşê ke nêweşxaneyî de yê û welatîyê şaristanî, Heyva Sor a Kurdî verê berê nêweşxane de nuqtayê kontrolî awan kerdê. Rewşa welatîyê ke şinê nêweşxane verê ke derbaz bibê yenê kontrol kerdene. Derheqê babete de Endamê Heyva Sor a Kurdî û welatîyê şaristanî şîroveyê xo ma dir pare kerdî.

 

‘Amancê ma pawitişê nêweş û welatîyan o’

 

Endama Heyva Sor a kurdî Hiyam Ebdoye serê awankerdişê nuqteyê kontrolkerdişî de wina vat: “Wexto ke vîrusê Korona vila bi, ma di çadirê kontrolî vernîya nêweşxaneyî de da ro. Welatî ke yenê nêweşxane ma vernê de ma destpêk de rewşa înan kontrol kenê, dima ra danê derbazkeediş. No proses semedê pawitişê vîrusê Koronayî de gamêka zaf girîng a. Eynî wextî de semedê welatîyan zî baş o. Destpêk de ma germbîyayîşê wucudê înan gênê, ma pêro kontrolan kenê. Ronayîşê çadirê kontrolî yew ci ra tedbîrê pawitişî şarî yê vîrusî ra yo. Bi omidê her kes rewşa xo verê ma de kontrol bikero û vîrus, derbazê merdimanê bînan nêkero.”

 

‘Ganî ma pîya hemverê vîrusê Koronayî de xover bidê’

 

Cinîya bi nameyê Helîma Mîrza zî wina vat: “Çîyêko zaf baş o ke merdim verê nêweşî giran bibo û rewşa xo kontrol bikero. Heyva Sor a Kurdî bi pêro îmkananê xo xizmetê nê komelî de yo. Ma keda înan pîroz vînenê. Goreyê nê ma zî hetkarî danê înan ke ma xo vîrûs ra pawenê. Eke ma goreyê qerarê înan têbigeyrê, ma eşkenê xetereyê vîrusî serê xo de kêm bikerê. Wa her kes taximê weşîye goşdarî bikero û verê komelê xo de wayîrê erc û mîsyon bo. Ganî ma pîya hemverê vîrusê Koronayî xover bidê.”