AMED - Goristanê Sîsê yê Licê ke çend rey bi hêrişî dir rî bi rî mendî û tewr peyîn zî semedê şewatê ke Licê de amebi meydan, ame texrîb kerdene. Keyeyan serê nê hêrişan de reaksîyon ramojnayî û vatî: “Ma key biwazê serdayîşê goristanê xo bikerê, rastê texripkerdişê goristanan yenê û zerrîya ma veşêna. Çi dewaya esteyê ma kenê ke hende hêrişê goranê ma kenê.”

 

Goristanê Sîsê yê Licê ke çend rey bi hêrişî dir rî bi rî mend, tewr peyîn seba şewato ke Licê de ame meydan, texrîb bîbî. Keyeyê ke semedê Roşanê Qurbanî şî serdayîşê goristanan rastê gorê ke ameyê veşnayîş ameyî. Keyeyan kerrayê gorê domananê xo newe kerdibî. Keyeyan serê hêrişê goristanan de qisey kerdî.

 

Asîye Kilinçe ke gorê şajê ci ameyo veşnayene, dîyar kerd ke veşnayîşê goristanan tu ca de çin o û vat: “Goristanê ma veşnayî, zulmê xo her ke şino zêde kenê. Çi esteyê domananê ma ra wazenê. Esteyê domananê ma ra zî tersenê. Zanê ke cayê şerwananê û vanê qey do reyna wirzê înan dir şer bikerê.”

 

‘Êdî bi merdan dir şer kenê’

 

Hemsereka Komeleya Kultur û Yewîya Paştdayîşî û Ercnayîşê Kesê ke Dergûşê Şaristanîyê Merdimê Xo Vindîkerdê (MEBYA-DER) Yuksel Almase zî wina vat: “Nê têkoşînî de heta nika bi ganeyan dir şer kerdî û ser nêkewtî. Nika rewşa ke tede yê sewîyeya qedêyayîşê înan o. Hem hetê şerî de netîceyêko bidest nêkerdî, hem hetê sîyasetî de eynî rewşe ciwîyenê. Êdî sîyasetê înan qedîyayo. Tirkîya wina kewta mîyanê teşqele ke nika merdan dir zî şer kena. Ma wazenê serdayîşê goristananê xo bikerê la wexto ke ma şinê serê goristanan zerrîya ma dejena. La ganî tena zerrîya keyeyan nêveşo, heme merdimayî biveşo. Merdim senîn merdan dir şer keno. Coka ma veng danê pêro merdiman ke wa êdî vera nê vengê xo vejê. Wa nê bêhuqûqîyan qebul nêkerê û wayîrê goristanan vejîyê.”

 

‘Ma wexto ke gorastananê xo vînenê zerrîya ma veşêna’

 

Munevver Pasîne zî wina va: “Şima dewaya çi serê ma de kenê. Ma çend yenê goristananê xo zerrîya ma veşêna. Ma çîyêko şima ra nêwazenê ke kw şima zulmê xo ma ser de nêqedênê. Hende xo ra vanê musulman ê, muslumanî de şewatê goristanan çin o. Çira hende ma ra tersenê. Ma nêşîyê welatê înan talan nêkerdo. Ma tena serê erd û wareyê xo de yê. Kerrayê goristanan nînê şiknayene, goristanî nînê veşnayene.”

 

‘Ganî tu kurd hemverê nê hêrişan de bêveng nêmano’

 

Rabîa Tekîne zî wina vat: “Heme daristanan veşnayî, mîyanê daristanan de xeylêk heywanî zî ameyî veşnayene. Hem xozaya ma çin kenê, hem zî goristanê ma veşnayî. Wendiş û nuştişê mi çin o, coka mi qurdeleyêka sûre gorê lajê xo de gieê dabî ke wexto ke ez bêrî nas bikerî. Reyan tersena ke a qurdale zî berzê. Çi dewa merdan ra kenê! Heta şarê Kurdî sax bo do dewaya xo ra fek vera nêdê. Dewlete hende zulm kena, la ma reyna zî dewaya xo ra fek vera nêdanê. Ganî tu kurd hemverê nê hêrişan bêveng nêmano. Wayîrê dewa xo û goristananê xo vejîyê.”