AMED - Hemseraka Şubeyê Hûmara 2yîn ê Egîtîm Senî ya Amedî Zuhal Sezere polîtîkayê îqtîdarî yê ‘neslê dîndar’ ercna. Zuhale wina vat: “Amed de 508 hezar wendekarê mekteba sereyîn, 38 hezar wendekarê îmam hatîpî estê. Wendekar û keyeyan bê alternatîf verdenê. Wazenê mecbûrî îmam xetîban verdê. Domanan rê nê meşrû vînenê. Ganî cewabê nînan bêro dayene.”

 

Rojê vîyarte de Egîtîm Senî yê Amedî dîyar kerd ke bi rayberîya Walîtiyê Amedî dir 38 sazgehê îslamî yê bi nêzdîyê xo yê îqtîdarî yenê zanayene, bi beşdarbîyayîşê mudirê Egîtîm Bîr-Sen û Mudidê perwerdî yê Perwerda Netewî yê merkez û qezayan 27ê Temmuze de Keyeyê Mamosteyan ê Bajarê Girdî de kombîyayîşêko nimte kerdê. Ame îdiakerdene ke kombîyayîş de ameyo hedefkerdiş ke her qeza de hûmarêke bêra dîyarkerdene û mektebê Îmam Hatîbî bêrê qeydkerdene.

 

Hemsereka Şubeyê Hûmara 2yîn ê Egîtîm Senî ya Amedî Zuhal Sezere polîtîkayê perwerdeyê dînî yê îqtîdarî ercna.

 

‘Wazena serê ciwanan de bernameyê xo bi ca bîyarê’

 

Zuhale dîyar kerd ke îqtîdar her firsend de qalê neslê dîndar keno û vat: "Propaganda, xebat û qerarê înan nê het de yê. Her wext serê neslê ciwanan de bernameyê xo bi ca anê. 18 serrî yo çîyêko nêvînenê, yan zî bivînê bi ca nêanê. Nêeşkenê neslê dîndar biresnê. Heta ke ê mobîng bi ca bîyarê do verpayê ci bo.”

 

Zuhale wina vat: “Sîstemê perwerdeyî ke nika pêşkêş kenê, ameyo vengkerdene. mufredatê înan veng o. Perwerdeyê ke hewcedarîyê domanan pê esto, nîno pêşkêşkerdene. Yanî her çî yeno ferzkerdene. Mufredatêko vernî averbîyayîşê mezgê înan bigîro esto. Semedo ke hedef resnayîşê neslêko dîndar o.”

 

‘Wendekaran bê alternatîf verdenê’

 

Zuhale tewr peyîn wina vat: “Wendekarê ke adresê înan îmam xetîb yeno ramojnayene, mecbûrî qeyd bikerê. Seba ke alternatîfê înan çin o. Amed de bi rayberîya Walîtî kombîyayîşêko ame kerdene. Kombîyayîşêko nimte. Wendekaran û keyeyan bê alternatîf verdêne. Nê domananê ma rê meşrû vînenê. Gerek cewabê înan bêro dayene. Rewşa ke proje bêro caardene, do tabloyêko bi xof vejîyo werte. Ma bi tu hawayî nê polîtîkayan qebûl nêkenê û ma do wayîrê domananê xo vejîyê.”