WAN - Dewa Kolanisî bi awanîya xo ya wextê Armenîyan ra menda yena zanayene, bi xoza û çimeyê awa xo bale ancena. Zubeyde Yucebaşa ke dewe de ciwîyena vat, aye dewa xo bi cuyabajarî dir şaristanî dir nêvurnena.

 

Dewa Kolanisî ke qilê Koyê Erekî ya Îpekyolê Wanî de ca gêna, berardişê xo yê wextê Armenîyan yena zanayene. Nêzdîyê 50 keyeyî dewe de yê û xozaya ci hizûr dano. Zubeyde Yucebaşa 28 serrî dewa Kolanisî de ciwîyena, derheqê cuya dewe de qisey kerd.

 

Zubeyde ke 28 serrî verê Qelqelî yê Wanî ra ameye dewa Kolanisî de bi ca bî wina vat: "Cuy adewe verê zehmet bî. Ma zaf xebityayîne, rincan bîne. Ma pes antêne, kolîyan kom kerdêne, ma şîne zozanan û 4 şan de ameyîne keye. Ma nika rehet ê, ma sey verê nêxebityenê. Êdî her çî girêdayê teknolojî yo. Ma tena pes ancenê. Fêkîyanê xo baxçe ra arêdanê û wişk kenê. Ma fêkîyê xo yê ke wişk kneê, kesê ke yenê dewe ma danê înan. Şarê tîya baxçeyê fêkîyan ramnenê."

 

'Ez dewa xo bi şaristan nêvurnena'

 

Zubeyde bale ante serê krîzê ekonomî û vat: "Merdimê ma yê şaristan de ciwîyenê, nê probleman vanê. Di serrî yo peyîn de şarî hetê ekonomî ra xeylê problemî ciwîyayî. Ma merdimê xo yê ke şaristan de ciwîyenê, eşnawenê. Coka ma dewa xo de ciwîyenê û berardişê xo bi xo kenê. Cuya dewe zaf weş a. Ma dewa xo bi şaristan nêvurnenê."