ŞIRNEX - Kulturê dengbêjî cuya kurdan de dengbêjî wayîrê ke cayê girîng û dewlemendî de yo. Fadîle Durmuş (65) zî semedo ke wayîrê nê kulturê bivejîyo, dengbêjî kena û wina vat: “Tu kes wayîrê kulturê dengbêjî nêvejêno. Ma nêwazenê kulturê ma çin bibo. Çinbîyayîşê kulturî, çinbîyayîşê kurdan o. Semedo ke kultur merdimî serê lingan de verdeno.”

 

Mîyanê kurdan de kulturê dengbêjî, wayîrê cayêko girîng de yo. Dengbêj/e bi berardişê xo hem hedîseyê tarîxî qal kenê û hem zî cuya xo qal kenê. Dengbêj/e ke domanîya xo de heta nika kilaman vanê, wayîrê kulturê dengbêjî vejênê. Dayîka bi nameyê Fadîle Durmuş (65) a ke bi eslê xo dewa Pîroze ra ya qezaya Elkê ya Şirnexî de manena, emrê domanîya xo de bi zor hetê keyeyê xo ra ameya zewicnayîş.

 

‘Nika tu kes wayîrê kulturê dengbêjî nêvejêno’

 

Fadîle, derheqê dengbêjî de wina vat: “Kulturê dengbêjî ma kurdan serê lingan de verdeno. Semedo ke ma kurdî dej, elem, weşî û şayî pêro bi dengbêjî qal kenê. Mi zî kilamê ke dayîka xo ra eşnawitî reyna kerd. Nika tu kes wayîrê kulturê dengbêjî nêvejêno. La ganî ma kulturê xo bipawê. Ez êdî sey verê zêde dengbêjî nêkena. Ge-ge wexto ke bi cinîyan dir ma yenê têhet, ma kilaman vanê. Ez nika zî zozananê Elkê de koçerî kena. La tîya de cereyan çin o, ma şandînan kom benê û kesê ke zanê kilaman vanê.”

 

‘Ganî ma dengbêjî ciwananê xo rê bimusnê’

 

Fadîle, dîyar kerd ke rojê verê hîna weşî bîyê û vat: “Êdî kêfweşî û şayî sey verê nêmendê. Tu kes êdî sey verê nîyo. Wext wextê verê nîyo. Ciwanê nika qet nêzanê dengbêjî bikerê. Semedo ke teknolojî aver şîya êdî ciwanî goş nêdanê kulturê dengbêjî. Ez bi taybetî kilamê herêmî vana. Wa heme kes wayîrê dengbêjî vejîyo. Semedo ke kultur, merdiman serê lingan de verdeno û bîyayîşê ma kurdan nîşan dano. Çinbîyayîşê kulturî, çinbîyayîşê kurdan o. Ganî ma dengbêjî bimusnê ciwananê xo. Kulturê dengbêjî dayîk û pîyê ma ra mîrasêko yo. Ma wayîrê mîrasê xo vejîyê.”