ÊLIH - Elmşe Elmehmûdî ya ke Tilhemis ra koçê Êlihî kena emrêko qij de yena zewicnayene û domananê xo bi werdê cîranan wey kena wina vana: “Ez nêciwîyaya, wa domanê mi qedera mi pare nêkerê. Wa ma dir bibê hetkar.”

 

Elmşe Elmehmudî, eslê xo dewa Tilhemisî ra ya. Netîceyê hêrişê çeteyanê DAÎŞî de pîyê xo û 2 birayê xo vindî kena û aye û birayêko xo û dayîke xo bi hezaran koçberan dir verê xo danê sînorê Tirkîya. Wexto ke xeylê nê kesî verê xo danê bajaranê sey; Amed, Wan, Mêrdîn û Riha de bi ca benê, keyeyê Elmşe zî Êlih de bi ca benê. Nê keyeyî mîyanê şert û mercê xidar de hewl danê ke biciwîyê. Elmşe zî emrêko qij de yena zewicnayene û nika Êlih de cuyêka xidar derbaz kena.

 

‘Wa domanê mi cuyêka weş biciwîyê’

 

Elmşe ma dawetê keyeyê xo kerd û derûdorê xo ramojna ma. Keyeyo yew qat teber ra wayîrê dîmenêko xerab bi, zerre de zî wayîrê dîmeneko tewr xirab bi. Destşok tena qulêke ra ameyne meydan. Mitfax û banyo yewbî û nê zî pîlêyê ci tewr zêde 2 metre yê. Zere werd û xida hema vaje qet çinî bi. Keye odayêke ra yeno meydan. Elmşe keye û dêsê ci nîşanê ma dana û vana, ez tena wazena ke domanê mi cuyêka bi hizûr biciwîyê.

 

‘Wa domanê mi biwanê’

 

Elmşe dewam de wina vat: “Emrê mi hema vaje reseno 22 serran. 2 domanê mi estê û cuya mi sey ke şima vînenê no keyeyo xirabe de pûyeno şino. Wexto ke ez newe zewicyabîya, rewşa ma tewr baş bî. La embazê mi qezayêk derbaz kerd û nika zî serê çopan de şew û roj kartonan kom keno. Werdo ke ma biwerê çin o. Her roje cîranêk xeyrê xo werd dano ma. Domanê mi vêşanî ra mirenê. Mîyanê nê çar dêsan de ê zî perîşan bî. Waştişê mi oyo ke domanê mi sey mi nêciwîyê. Wa cuya înan sey mi nêbo. Ez nê keyeyê yew qat de merda, wa ê biwanê û biciwîyê xo rê.”

 

‘Wazena xo bikişî’

 

Elmşe tewr peyîn wina vat: “Wexto ke domanê mi vêşan benê yan zî çîyêk wazenê ke ez nêeşkena pêşwazî bikerî, hema ez wazena xo bikşî. Dayîke mi zî agêraya Rojawan. Cuya mi pêro bi şer, bêrîkerdiş û feqîrî ya. Mi dewlete ra zî waşt ke hetkarî bido ma. Seba multecîyan hetkarî ameyîne kerdene. Hema mi netîceyêk hetkarî nêgirewto. Omid kena ke ê do demêko nêzdî de cewabêk bidê mi û ma rê bibê hetkar.”