Sara Şêx Hesen

 

HELEB - Endama Keyeyê Êzîdîyan Rûşîn Mûse, derheqê sergerra fermanê 73ine de wina vat: "Bi rayberîya YJŞî artêşa cinîyanê Kurdê Êzîdî ame awankerdene û do artêşa cinîyan heyfê pêro cinîyê Êzîdijan bigîro.”

 

3yê tebaxa 2014 de çeteyê DAIŞî hêrişê Şengalî kerdî û netîce de bi hezaran sivîlî cuya xo vindî kerdî, koçber bî û cinîyê Şengalijî hetê çeteyê DAIŞî ra ameyî remnayene. Heta roja ewro zî xeylê cinîyê Şengalî qedera înan dîyar nîya. Sergerra 6in fermanê Şengalî de Endama Keyeyê Êzîdijan Rûşîn Mûse şîroveyê xo ajansê ma dir pare kerd.

 

‘Kurdê Êzidî ala xoverdayîşî vera îşxalkerdoxan berz kerdî’

 

Rûşîne destpêkê vatişe xo de bale ante serê hêrişanê çeteyanê DAIŞî û wina vat: “Ma destpêk de hêrişê çeteyê DAIŞî yê ke serê Kurdê xo yê Êzîdî de kerdî şermezar kenê. Waxto ke merdim qalê fermanê Şengalî keno, yewin dejêko giran keweno zerrîya merdimî, seba ke çîyê ke Şengal de qewîmîyayî ti tarîx de nêamebi ciwîyayîş. Hêrişê çeteyê DAIŞî de cinîyê Şengalî xeylê dej dî, bi hezaran ameyî remnayene û bazaran de ameyî rotiş. Nê qirkerdişî de domanan ra bigî heta pîlan pare xo ci ra girewtî. DAIŞ bi zor waştêne Kurdê Êzîdijan bikero musluman, la ey serkewte nêbî. Raşt o, Kurdê ma yê Êzîdî zaf dej dî, la qetî teslîm nêbî û ala xoverdayîşî vera îşxalkerdoxan berz kerdî.”

 

‘Erj û mîrasê xo yê Êzîdî ma do bipawê’

 

Rûşîne dewam de wina vat: “Verê ke no ferman serê komelê Êzîdîjan de bêro kerdene, şarê ma bê perwerde bi. Wexto ke çeteyê DAIŞî hêriş kerdî, şar mecbûr mend ke koçber bibê û xeylê cinî û domanî hetê çeteyan ra ameyî remnayene. Dimayê vindîkerdişê DAIŞî Kurdê ma yê Êzîdî hemverê hêrişan rêxistinbîyayîşê xo awan kerdî û artêşa xo bi rêxistin kerdî. Sewbîna perwerdeyê vîrdozî ra derbas bî û rastîyê dişminî mûsayî. Nika şarê ma bi hawayêko bi rêxistinkerde têgeyrenê ke reyke bîn bi fermanêko wina dir rî bi rî nêmanê. Sewbîna lazim o ke pêro keyeyê ma yê Êzîdî domananê xo serê rastîya dînê xo perwerde bikê, seba ke ê ke ameyox bi pawê neslê ameyox ê.”

 

‘Bi rêxistinbîyayîş ma do serkewtişê komelê Êzidî qetî bikerê’

  

Rûşîne tewr peyîn wina vat: “Semedo ke ferman reyna nêbo, hewceyo ke ma xo bi rêxistin bikerê û yewîya xo awan bikerê. Bi yewîya xo ma do pêro fermanan berê. Nika bi rayberîya YJŞî artêşa cinîyanê Kurdê Êzîdijan ame awankerdene û do artêşe heyfê pêro cinîyê Êzîdijan bigîro. Bi rêxistinbîyayîşî ma do serkewtişê komelêko Êzidijan qetî bikerê.”