DÊRSIM - Hunermend Zeynep Kiliçe ke bi lehçeyê Kirmackî yê Kurdî, kilaman vana dîyar kerd ke ziwan semedê komelî zaf girîng o û wina vat: “Ziwan çin bo, kilamê ma zî çin ê, deyîrê ma zî çin ê.”

 

Hunermend Zeynep Kiliça Dêrsimije albumê xo yê ‘Ju Game’ kilamanê xo bi lehçeyê Kirmackî yê Kurdî vana. Zeynebe wina vat: “Ziwan vîrê merdimî yo, rîyê merdimî, ciwîyayîş û her çî merdiman o. Ziwan çinbo merdimî senîn ciwîyenê. Ziwanê dayîke êdî kêm yeno qiseykerdene. Eke merdimî ziwanê xo nêmusê do her çî vindî bibo. Wina şêro do vîyarte, kilamî, hîkaye û cuya ma çin biba.”

 

‘Ganî kilamî Kurdî bêrê vatene’

 

Zeynebe dîyar kerd ke Dêrsimo ke wayîrê tarîx û kulturêko bingeyîn o asîmîlasyonêko pîl yeno kerdene û wina vat: “Xeylê cayî kilamê Tirkî yenê pirodayîş. Tirkî yena qiseykerdene. Cayê tîya kamî rê xizmet kenê, şarê ma rê kenê. Ganî seba nê bi kultur û ziwanê xo xizmet bikerê. Ganî bi ziwanê xo deyîran vajê. Mi albumêk vet û ez wazena kilamanê xo bieşnawa. Tena ê min ney, hunermendê bîn zî. Ma erje danê ziwan, huner û hunermendê xo yê ziwan û kulturo ke vindî beno.”

 

‘Ganî cuya rojane de ziwanê dayîke bêra qiseykerdene’

 

Zeyneba ke heme kilamê xo bi Kirmanckî vana, vat tena kilaman de ney her wareyê cuya rojane de ziwanê dayîke bêro xebitnayene. Zeynebe vat, rewşa verpayê ci de do ziwan tena kilaman de bimano.