AMED - Cinîyê Sûrijî dîyar kerdî ke hukmat gumanbarê tacîz, tecawiz û yê şîdetê hemverê cinî û domanan kenê de ceza nêkeno û coka hukmat sûcdar o û wina vat: “Ma êdî nêeşkenê domananê xo emanetê kesî bikerê, ma nêefterenê vejê teber. La ganî domanî azad pîl bibê.”

 

Vera ke gumanbarê şîdetî hemverê cinî û domanan sûc kenê bêrê cezakerdene, Tirkîya hewl dana ke Pêameyîşê Stenbolî bianca. Cinîyê ke seba Pêameyîşê Stenbol û destkewtişê cinîyan ser o vejîyayî meydanan, reaksîyonê xo yê vera hukmatî ardî ziwan.

 

‘Ganî cezaya muebetî bêra dayene’ 

 

Remzîye Tane ke vat, ganî gumanbar bê ceza nêmanê û wina vat: “Gelo dayîkî domananê xo seba nê anê dinê? Ez êdî nêefterana domananê xo verê kesî de verdî. Ez deqeyêk domananê xo verê xo ra nêvisnena. Pêro dayîkî sey min ê. Wa  cezaya muebetî bidê tacîzkaran ke reyke bîn wina nêkerê. Ganî dayîkî têkoşîn bilerê û vernîya nê bigîrê.”

 

‘Ganî cinî dest bidê yewbînan’

 

Zelal Katare ke 4 domananê waya xo ra ewnîyena wina vat: “Ma wazenê domanî azad bê. La ma nêefterenê bierşawê cayêke. Ganî kuçeyan de kay bikerê la ma nêefterenê. Ma vera her tewir şîdetî yê. Camêrdî cinîyan qetil kenê. Yê ke wina kenê cezayê giran wa bigîrê. Dewlete kiştox û tecawizkaran vera dana. Ganî cinî dest bidê yewbînan û vera nê têkoşîn bikerê.”

 

‘Ganî cezaya giran bêra dayene’

 

Şukran Ekere zî wina vat: “Tu gunayê domanan çin o. Înan ra çi wazenê? Domanê ma estê, tu dayîkî nêwazenê çîyêk wina bêro ciwîyayîş. Ma nêwazenê dejê domananê xo biciwîyê. Ma bi ters domananê xo erşawenê cayêke. Ma her wext bi endîşe yê. Ganî cezaya giran seba gumanbaran bêra dayene. La yenê veradayîş û reyna eynî çî kenê.”

 

‘Tecawizkarî merdim nîyê’

 

Songul Devecî zî reaksîyon ramojnayî û dîyar kerdî ke yê tecawizê cinî, doman û heywanan kenê merdim nîyê û wina vat: “Ez tersena tena şêrî cayêk. Ganî gumanbarî cezayê giran bigîrê. Polîtîkayê bêcezabîyayîşî rayîrê zêdebîyayîşê hedîseyan akerê. Ganî ma bi weyîye vera nê têkoşîn bikerê.”

 

Esnaf Fatma Arpa zî bale ant serê polîtîkayê bêcezabîyayîşê û wina dewam kerd: “Ganî cezayê giran înan rê bibirnê. Ganî cinî xo qels nêvînê. Cinî xurt ê. Cinî biwazê eşkenê her çî bikerê.