AMED -  Merdimê Vindîbîyayeyan hewteyê 599 de reyna waştî kiştoxî bêrê muhakemekerdene.

 

Merdimê Vindîbîyayeyan û Komeleya Heqê Merdiman (ÎHD) ê Şubeyê Amedî çalakîya “Wa vindî bêrê vînayene û kiştoxî bêrê muhakemekerdene” hewteyê 599ine de, serê înternetî bi parekerdişê videoyî viraştî. Merdimê Vindîbîyayeyan çalakîya xo ya nê hewteyî de, aqûbetê Sabah Orûçî (17) ê 13ê Sibata 1996 de keyeyê xo yê qezaya Bîsmîlî ya Amedî ra vejîya û reyke bîn zî zanayîş ci ra nêame girewtene, pers kerdî.

 

Îdarekara Şubeyê ÎHDyî ya Amedî Derya Yildirime, vîdeoyî de qisey kerd û wina vat: “Sabah Orûç serra 1979 de dewa Yukarîkonakê qezaya Şemrexî Mêrdînî de ameyo dinya. Sabahî mekteba sereyîn qedêna bi. Qezaya Bîsmîlî ya Mêrdînî de ciwîyayîne û karê masegirî kerdêne. Sabahî, 13ê Sibata 1996 de keye ra vejîyeno û reyke bîn zanayîş ci ra nîno girewtene. Keyeyê ci no ser de dest bi cigêrayîşê ci keno. Keyeyo ke Sabahî nêvîneno, muracatê Mudirîyê Polîsan, Qereqola Leşkerî û Serdozgerîya Komara ya qeza keno. La bi tu hawayî zanayîş aqûbetê Sabahî ra nîno girewtene.

 

Bale antî serê qereqole

 

Derya, dîyar kerd ke vindîbîyayîşê Sabahî dir hîn şahidan zanayîş da ke Sabah Orûçî Qereqola Tabûrî ya Bîsmîlî de yeno tepiştene û wina vat: “Keyeyî serê zanayîşê şahidan dir reyke bîn zî muracatê sazgehê fermîyan kerdî. La selahîyetdarê fermî vatî ke tepişte nîyo. Bi no hawayî reyke bin zî Sabah Orûço 17 serrî ra xebere nêameye girewtene.”