MEXMÛR - Bi munesebetê Roşanê Qurbanî şarê Wargehê Multecîyanê Mexmûrî dimayê nimajê roşanî verê xo dayî goristanê Şehîd Nujîne. Dimayê serdayîşê goristanî şar beşdarê merasîmê Sazgehê Keyeyê Şehîdan bî.

 

Bi wesîleyê Roşanê Qurbanî şarê Wargehê Multecîyan ê Şehîd Rûstem Cûdî (Mexmûr) dimayê nimêjê roşanî verê xo dayî Goristanê Şehîd Nujîne dua kerdî û şekir yewbînan rê vila kerdî. Dima ra zî beşdarê merasîmê Sazgehê Keyeyê Şehîdan bî. Merasîm de serê nameyê Melayan de Mela Mihiyedîn qisey kerd.

 

Mella Mihiyedîn wina vat: “Ma sere de roşanê Rayber Apo, têkoşerê azadî û temamê şarî kurdî pîroz kenê. Zulmo ke nika mîyanê zîndanan de yeno kerdene, tu demî de û ne zî tu cayan ameyo kerdene. Pêxember vano ke xeyro pîl ke însan bi miletê xo dir rast bo, kesê ke xiyanet qewmê xo û eşîretê xo bikero nîyo.”

 

Serê nameyê Meclîsê Şarî yê Demokratîk Hemsereka Meclîsî Hacî Kaçanî qisey kerd û vat: “Ma sere de roşanê şima pîroz kenê. Bi omidê serrê ameyox de bi Rayber Apo dir roşan derbaz bikerê. Ma prosesêko xesas de yê. Ma do sey wargeh heta peynî têkoşînê xo dewam bikerê û ma de sereyê xo nêtewênê. Bi nê omidan reyna roşanê şima pêrûne pîroz kenê û Şehîdê tekoşînê azadîye anê xo vîr. Wa Roşanê Qurbanî bibo wesîleya aştî û azadî.