AMED - Îdarekara SESî ya Amedî Rozerîn Çatake û Endama Meclîsê Şarederîya Yenişehîrî Emîne Kaya ke pêwa 28 cinîyan ameybî destbendkerdene û dima ra zî bi şertê kontrolê edlî serbest ameybî veradayene, diyar kerdî ke nê se serrî de heme çî vuryeno la vindertişê Tirkîya serê cinîyan nêvuryeno û vatî na rewşa şermezarkerdişî ya.

 

Çarçewaya tehqîqatê Serdozgerîya Komara ya Amedî de derheqê 28 cinîyê ke temsîlkarîyê rêxistinê komelî kenê de qerarê tepiştişî amebi dayene. Nînan ra 28 cinî ameybî tepiştene û 23 cinî zî şertê kontrolê edlî ra serbest ameybî veradayene. Îdarekara SESyî ya Amedî Rozerîn Çatake û Endama Meclîsê Şaredarîya Yenîşehirî ya Amedî Emîne Kaya ke serbest ameybî veradayene, dîyar kerd ke Tirkîya bi xeylê probleman dir rî bi rî ya û tewr zêde vera nê probleman veng vejê.

 

‘Hemverê destbendkerdiş û tepiştişan ma do têkoşînê xo dewam bikerê’

 

Rozerîne wina qal kerd: “Wexto ke ez ameua destbendkerdene mi sebebê destbendkerdişê xo pers kerd la înan nêvat. Dima ra mi reyna pers kerd û înan vat, seba Komeleya Cinîyan a Rosaye û xebatê bi rêxistinî ya. Sey ma çîyê zaf xirab kerdê, têgeyrayîne. Mi ra persê serê PKKyî pers kerdî la mi vat, ez sendîka de ya û şima eşkenê hetê sendîkaya ra eşkenê çîyan pers bikerê. La mi êdî persanê înan rê cewab nêda. Ma çar rojî nezaretxaneyî de mendî. La ma dimayê têkoşînê xo yê. Ma çîyêko şaş nêkerdo. Ma do seba heqê cinî û domanan têkoşînê xo dewam bikerê.

 

‘Şert û mercê nezaretxaneyî yê pakitî xeylê xirab bi’

 

Rozerîne wina vat: “Nezaretxane de seba ke merdim bi vîrusê Koronayî biko şert û mercî amade bî. Ganî biameyne dezenfektankerdene la pakitîyêk çinbi. Ma ra persa şima çira beşdarê 8ê Adare bîye kerdêne. Ez cinî ya û heqê cinîyan pawena. Helbet beşdarê 8ê adare bena. La nê beşdarbîyayîşî sey sûcêk vejenê vernîya ma. Sewbîna sloganê, ‘ma bêveng nêmanenê, nêtersenê û îteat nêkenê’ persayî. Tirkîya xeylêk bi probleman dir rî bi rî ya û vera nê probleman zî tewr zêde cinî veng vejenê. Coka hende hêriş serê ma de esto la ma do têkoşînê xo bi her tewir û her ware de dewam bikerê. Seba ke ma heqdar ê.”

 

‘Heqê ma yê esas yenê cigêrayîş’

 

Endama Meclîsê Şarederîya Yenîşehirî Emîne Kaya zî wina vat: “Xora ma sîyasetmedar ê, yenê naskerdene. Bi hawayêko zanebîyayîş wina kenê. Seba ke wazenê sîyasetê kurdan çinbikerê, coka hende hêrişan serê ma de kenê. Destbendkerdiş de persê înan balkêş bî. Şînê ke ma şîbî pers kerdêne. Ma sîyasetmedar ê û karê ma oyo ke ganî ma her wext şarî dir bê. Bi rastî zî rewşa tirkîya ver bi vindîkerdişî ya.”