MÊRDÎN - Taxê ke DEDAŞî 14ê Gulane de cereyan birnabi, cinîyan reaksîyon ramojnayî û vatî: “Wa ma sey dişmin nêvînê. Qet nêbo wa verê roşanî cereyan abikerî.”

 

Vilakerdiş û Cereyanî yê Dîcle A.Ş (DEDAŞ) bi îdiayê 14ê Gulane de cereyanê nêzdîyê 100 dewê ke girêdayê Dêrik, Qoser û Artuklu yê Mêrdînî yê birna. Bi cereyanî dir awe zî nêameye û DEDAŞî seba welatîyê taxe vatî deynê şima estê. Welatî do bê awe û cereyan bikoyê roşanê Qurbanî.

 

‘Wa sey dişmin tênêgeyrê’

 

Fehîme Dogana ke dewa Mele ya Artuklu ya girêdayê merkezî de ciwîyena vat, seba birnayîşê cereyanî awe zî nîna û nêeşkena baxçeyê xo awe bida û wina vat: “Ma nêeşkenê sebze û fêkîyê xo zî bişoyê. Bi mengan o ma perîşan ê. Baxçeyê ma ziwa bi. Domanê ma perîşan bî. Nînê keye zî. Binê veresîya dare de ronişnenê. Ma selahîyetdaran ra wazenê ke çîyêk bikerê. Kes dişminê kesî nîyo. Wa ma sey dişmin nêvînê.”

 

‘Reyna cinî ancenê’ 

 

Celîle Çiraya ke dewêka Evdo ya girêdayê qeza de ciwîyena reaksîyon ramojna û vat: “Roşan yeno, la ma tu amadekarî nêkerdo. Wa peynîya nê îşkenceyî bîyarê. Domanê ma roje saetêk hewaya honik vînenê. Nêweşê ma estê, kal û pîrê ma estê. Baxçeyê ma wişk bî. Reyna çi bibo bi cinîyan beno. Wa çareserîyêk bivînê êdî bes o.”

 

Hanim Çiraye zî vat, verê cereyanî heme hacetê înan yê elektronîk veşayî û wina vat: “Ne odeyêka ma pak mende, ne zî cil û belgê ma yê pak. Ma wina kewenê roşan. Her kes amadekarîya roşanî keno la ma na rewşe de yê. No heq nîyo.”