WAN - Cinîyê destveng bazar ra ageyrayî wina vat: “Hesabê keyeyî bazar de nêvejêno. Ma destê xo dergê çi bikerê ma peyser ancenê.”

 

Goreyê dayeyê Sazgehê Îstatîstîkî Tirkîya enflasyon, menga hezîrane de se ra 1.13 zêde bi û serre zî se ra 12.62 yo. Krîzê ekonomî ke bi vîrusî dir zêde bi zî tesîr welatîyan ser o kerd. Cinîyê taxa Xaçortî ya Wanî, bazaro ke awan bibi şîroveyê xo ma dir pare kerdî û vatî ameyê sewî ke nêeşkenê çîyêk bigîrê.

 

‘Esnaf zî perîşan welatî zî perîşan bî’ 

 

Elîf Ogute vat ke destê xo danê çi reyna peyser ancenê û vat: “Dimayê vîrusî şar hîna bi feqîr. Yê ke yenê bazqr, nêeşkenê çîyêk bigîrê. Veng ageyrenê. Esnafî nêeşkenê çîyêk biroşê. Merdimî êdî nêeşkenê kîloyêk firingî bigîrê. Mêrdeyê mi tepişte yo, ganî seba ci pere bierşawî. 5 domanê mi estê. Ma wina îdare kenê. Wa ganî çareserîyêk bêro vînayene.”

 

‘Ma roşan de zî nêeşkenê çîyêk bigîrê’

 

Canan Durmaze zî dîyar kerd ke kes keye de nêxebityeno û wina vat: “Domanê mi cayêk de nêxebityenê. Ma nêeşkenê goreyê zerrîya xo çîyêk bigîrê. Roşan nêzdî yo la ma nêeşkenê çîyêk bigîrê. Hêzê ma çin o.”

 

‘Ez bi 10 TL ameya’

 

Safiye Kîtapçi zî ard ziwan ke bi 10 TL ameya bazar û nêeşkena çîyêk bigîro û wina vat: “Pere çin o krîz esto. Kes bi rêk û pêk nêxebetêno. Ma nêeşkenê lazimîyê xo bigîrê. Ez ameya bazar la hesabê keyeyî û bazarî nêbîyo. Ez dest veng ageyrana keye. Homa qebul nêkero.”

 

Aygul Yildirime zî reaksîyon ramojna û vat, ê destê xo bidê çîyêk 20-30 TL şino û vat mêrdeyê ci zî nêweş o kar çin o û ciwîyayîş zehmet o.