Rojda Aydin

 

ŞIRNEX - Hemsereka SESî ya Şirnexî Halîme Kara, dîyar kerd ke Cizîr de nêweşî kêm bîya la Şirnex, Hezex û Silopî de zêde bîya û wina vengdayîşê roşanî kerd: “Xetayê ke roşano bîn de ame kerdene, ganî nê roşanî de nêro kerdene. Wa roşan de tu kes nêşêro keyeyî yewbînan.”

 

Tirkîya de hûmara kesê ke bi şubeyê vîrûsê koronayî mirenê û pêkewenê zêde benê. Bi taybetî zî dimayê prosesê ‘normalbîyayîşî’ nêweşî zêde bî. Wextê peyîn de yew cayo ke tewr zêde korona ci vila bîyo Cizîrê Şirnexî yo. Heta nika roşanê remazanî ra nata Cizîr de 88 kes bi nêweşîye kewtê û 71 kesî zî nêweşî derbaz kerdî. Goreyê zanayîşê bi pêroyî Hezexê Şirnexî de 600 nêweş estê û 200yî zêdeyêr keyeyî kerdê karantîna. Hemsereka SESyî ya Şirnexî Halîme Kara, derheqê rewşa peyîn de û roşanê qûrbanî de ganî şar senîn xo bi pawo ser o ercnayîş kerd.

 

Nêweşî Cizîrî de kêm bîya

 

Halîme derheqê prosesî de wina vat: “Cîzîr de hûmara nêweşîyan kêm bîya. Roşanê remezanî de seba ke şar bi reyke de vejîya teber hûmare reyke de zêde bî. La nika na hûmare kewta û Hezex, Silopî û Şirnexî de nêweşî zêde bîya. No zî ramojneno ke şar zêde dîqat nêkeno. Zaf tay test yenp kerdene. Gama ke rewşa nêweşan giran bena test kenê. Nika pêro nêweşxaneyî pirr ê û coka ma zî kesê ke nêweşê erşawenê keye û tedawî kenê. Tewr zêde xebatkarê weşîye binê rîsk de yê. Gama kesêk nêweş bikewo heme kes nêweş keno. Ganî şarê ma tewr zêde dîqat bikero û tedbîranê xo bigîro.”

 

‘Testî zaf tay yenê kerdene’

 

Halîme, dewam de wina vat: “Testî zaf tay yenê kerdene û nêweşî bi no hewa vila bena. Ganî test seba xebatkaranê nêweşî û şarî yew bi yew bêro kerdene. Pawitişê xo ma bi xo bikerê. Ganî ma nêşêrê şîn û dawetan.”

 

Vengdayîş seba roşanî

 

Halîme, dîyar kerd ke xetayê ke roşanê remazanî de ameyî kerdene ganî nê roşanî de nêrê kerdene û wina vat: “Ganî şarê ma no het ra aya bo. Eynî wextî de wa roşan de kes nêşêro keyeyê yewbînan. Wa kes nêvejîyo bazar. Ganî şar tedbîranê xo bigîro. Heme kes wa xo bipawê.”