WAN - Hemsereka Şaredarîya Qeqelîyî Dîlan Orenciya ke vera ci qeyûm ame tayinkerdene, dîyar kerd ke hêrişê hemverê domanan û cinîyan parçeyêko polîtikayê şerî yê taybet ê û wina vat: “Ganî ma tewr zêde xo bi rêxistin bikerê û vengê xo berz bikerê.”

 

Tirkîya de serdemê AKPyî de şîdetê serê cinîyan sera hezar û çarsey zêde bîyo. Her roje xeberêka qetilkerdene û şîdetî yena eşnawitiş. Menga hezîrane de 27 cinî ameyî qetilkerdene. Mugla de Pinar Gultekin, Êlih de çawişo pispor M.O. tecawizê cinîyêka ciwan a 18 serrî kerd. Şirnex de reyna çawişo pispor hêrişê cinsî domana 13 serrî kerd. Pêwa nînan îqtîdar hewil dano ke xo Pêameyîşê Stenbolî ra bianco.

 

‘Şîdetê serê cinî û domanan berardişê sîstemî yo’

 

Dîlane dîyar kerd ke cinî û domanî hetê camêrdê ke dewlete înan pawena, bi şîdeto sîstematîk rî bi rî manenê û vat: “Şîdetê serê cinî û domanan berardişê sîstemî yo. Xeylê cayê Kurdistanî ma nê hedîseyan rê rast yenê. Şîdetê zerî keye, teber û karî seba polîtikayê dewlete yo. Eşkerayîye walîtîya Şirnexî ya 'alkol girewto’ nîno qebûlkerdene. Semedo ke nê sûcî bê ceza manenê coka dewam kenê.”

 

‘Polîtîkayê bêcezakerdişî hêz dano qatilan’

 

Dilane dewam de wina vat: “Fikrê zewacê domanan ê bi tecawizkarê xo dir, vistişê cezaya seba qrewat û taximê cilan benê sebeb ke sûckerdiş zêde bibo. Polîtîkayê bêcezakerdişî hêz dano kiştoxan. No zî beno sebeb ke îstismarê domanan bêro meşrûkerdene. Gulistane bi rojan o nêaseyena la gumanbar nîno tepiştene. Her roj cinayetê newe yê cinîyan yenê meydan. Înan her wext waştêne Pêameyîşê Stenbolî biamcê. Do rayîr ver bi şîdetî abikero.”

 

‘Ma eşkenê pîya serkewte bibê’

 

Dîlane tewr peyîn wina vat: “Eke ma pîya bi û ma pîya xo rêxistin bikerê, ma eşkenê serkewte bibê. Xeylê cinî estî ke çîyê ke ciwîyayî nêeşkenê qal bikerê. Rêxistinbîyayîş hêz dano cinîyan. Ma eşkenê pîya serkewte bibê. Ganî ma xo tewr zêde rêxistin bikerê û vengê xo berz bikerê.