AMED - Wahîbe Kaplana ke bi seyarrotişî debara xo kena dîyar kena ke zabitan çend caran dezgehê ci xira kerdê û hacetê ci desteser kerdê.

 

Qezaya Peyasî yê Amedî serê kuçeyê Bûlwarê Mahabadî de cinîyêke bala merdimî ancena ke zimistanî binê vewre û varanî de û hamnanî zî verê germbîyayîşê tîje de bi seyarrotişî debara xo kena. Nameyê na cinî Wahîbe Kaplan a û 55 serrî ya. Wahîbe vana ke dimayê ke mêrdeyê ci cuya xo vindî kerdo, bi domananê xo dir tena menda û 10 serrî yo bi seyarrotişîyê fêkîyan debara xo kena. Wahîbe derheqê xebata xo, xwe, zorî û zahmetîyê ke ancena ajansê ma rê qisey kerde.

 

‘Ez mecbûra ke debara xo bikerî’

 

Wahîbe ke 10 serrî yo seyarrotişî kena wina vat: “Demo ke mêrdeyê mi dinyaya xo bedilna, ez û domanê xo tena mendî û semedo ke ma debara xo bikerê ma dest bi karê bazarwanî kerd. La semedo ke ma zêde rotiş nêkerdêne, ma nêeşkayîne heqê bazarî bidayîne. Dimayê nê ma cayê cîya cîya dezgehê xo akerd, la zabitayan her wext hêrişê ma kerdêne û hacetê ma desteser kerdêne. Pêwa nê zî reyna mi cayêko cîya de dezgehê xo akerdêne. Semedo ke ez mecbûr a debara xo bikerî ke destê xo verê kesêko bîn de anêkerî. Bi 10 serrî yo ke ez karê seyarrotişî kena.”

 

‘Zabitayan hacetê ma berdî’ 

 

Wahîbe ard ziwan ke zabitayan hacetê ci desteser kerdê û nêdayê û va: “Zabitayê ke her firsendî de hêrişê dezgehê mi kenê, reyke reyna ameyî ke dezgehê mi xira bikerê. La mi destûr nêda û ma şer kerd. Mi vat, destê xo medê hacetanê mi la zabitan û polîsan dezgehê mi xira kerdî û hacetê mi desteser kerdî. Ez çend rey şîya verê înan ke eşyayê mi bidê la reyna zî nêdayî. Ma vizêr zî bindest bî û ewro zî bindest ê. Domanêk mi gurçikanê xo ra nêweş a/o û nêeşkena/o karêko bikera/o.

 

‘Wa cinîyê ma bixebityê’

 

Wahîbe veng da pêro cinîyan û vat: “Ez wazena cinî bixebityê la hewceyî tu kesî nêbê. Wa domanê ma nêkewê pey karê lêşin. Nika ma mîyanê feqîrî û problem de xo ver danê ke ma debara xo bikerê. Xebata ma kenê ke qîmê dayîşê fatûreyê ma zî nêkeno. Awe û ceyranê mi her wext yenê birnayene. Eke cayêko mende ê karê ma bibayîne, do cuya ma hîna asan bibayîne.”