MEXMÛR - Cinîyê Wargehê Şehîd Rustem Cûdî (Mexmûr) ke bi serrêke yo binê ambargoyî de yê ardî ziwan ke ê herre zî biwerê fek têkoşînê xo ra vera nêdanê û wina vat: “Ma do heta peynî xo ver bidê.”

 

Temmuza 17ê 2019 ra heta nika Wargehê Mexmûrî binê ablûqa de yo. Xeylêk rey hetê dewleta tirkî ra Mexmûr ame bombevarankerdene û welatîyê Mexmûrî dinyaya xo bedilnayî. Cinîyê Mexmûrijî derheqê ambargoyo ke bi serrêke yo dewam keno de şîrove kerdî. Cinîyan vat: “Ma do heta peynî vera nê zordarî xo ver bidê.”

 

‘Ma fek xoverdayîşê xo ra vera nêdanê’

 

Cinîya bi nameyê Wesfê Cizirî serê amancê ambargo de wina vat: “Seba zulm û tedayê dewleta tirkî ma fek dewa xo ra vera da û ma ameyî Mexmûr de bi ca bî. Dewleta tirkî bi teyare, çete û metodê ambargoyî hêrişê ma kena. Pêwa PDKyî tê geyrena û amanc qetilkerdiş û vilakerdişê ma yo. Bi serrêke yo rayîrê ma ameyo padayene û nêverdenê nêweşê ma zî derbazê nêweşxaneyî bibê. Semedo ke wargeh vila bikerê, hende zehmetî seba ma vejenê. La ma fek xoverdayîş ra vera nêdanê.”

 

‘Ma herre biwerê zî ma do fek têkoşînê xo ra vera nêdê’

 

Xunaf Paksuye zî wina vat: “Bi serrêke yo ambargoyêk hetê PDKyî ra serê ma de esto. Tu qanûn û kitêban de no wehşet nêameyo vînayene. Bi serrêke yo ma nêeşkenê xo rê kar bikerê, debara xo bikerê. Destûr nêdanê nêweşê ma derbaz bibê. Ambargoyî dir her şewe teyareyê dewleta tirkî serê ma de geyrenê. Domanê ma seba vengê teyareyan nêeşkenê rakoyê. Verê çimanê ma de bêrîvan û şivananê ma bombevaran kenê. Domanêk serê banî ra gineno/a erd ro nîmmerg beno/a, ma wazenê berê nêweşxane nêverdenê. Ewro pêro rayîr verê ma de padaye yo. Derûdorê ma pêro çeteyê DAÎŞî yê. Amancê înan teslîmkerdiş û vilakerdişê wargehî yo. La ma herre zî biwerê ma fek têkoşînê xo vera nêdanê.”