Safiye Alagaş

 

AMED - Verfeka HDKyî Îdîl Ugurlu reaksîyon vera destbendkerdiş û tepiştan da û dîyar kerd ke têkoşînê cinîyan hemverê faşîzmî asteng o û vat, ganî xeta têkoşîn û paştdayîşî pîl biba.

 

Hetê Serdozgerîyê Komara ya Amedî ra çarçewaya tehqîqato ke ame destpêkerdene de 14ê Temmuze saetanê sibayî de sereştişê xeylêk keyeyan ame kerdene. Sereştiş de 23 cinî 4 rojî destbendkerde yê. Reaksîyonê rêxistinê cinîyan vera tepiştişê cinîyan dewam kenê. Cinîyan reaksîyon vera hêrişan dayî û veng dayî ke vera tedayan, rêxistinbîyayîş girs bibo.

 

‘Îqtîdar têkoşînê cinîyan ra terseno’

 

Îdîle derheqê babete de dîyar kerd ke îqtîdar bi hawayêko sîstematîk hêrişê cinîyan keno û wina vat: “Her cinîya ke caardişê AKPyî ra vana ney, yena destbendkerdene yan zî yena tepiştene. Do cinî sere nêtewenê. Temehulê AKPyî hemverê têkoşînê cinîyan çin o, la tehemulê cinîyan zî caardişê AKPyî ra çin o. No têkoşîn do dewam bikero.”

 

‘Têkoşîn vera faşîzmî asteng o’

 

Îdîle dîyar kerd ke AKP serrê peyînan de her ke kerdişanê xo bi otorîterî û faşîzmî keno û wina vat: “Bêguman astengîyê tewr pîl ê vernîya faşîzmî têkoşînê cinîyan o. Pêameyîşê Stenbolî bi ca nîno. Nika rojeve de yo ke do pêameyîş peyser biancê. Bi sebebê ke domanan bi tecawizkaran dir bidê zewicnayîş, tecawîzkerdiş sîstematîk kenê.”

 

‘Ganî ma vatişan ra bivejîyê û şêrê çalakîyan’

 

Îdîle tewr peyîn qiseykerdişê xo de dîyar kerd ke cinîyan bi kedêka pîl destkewtiş kerdê xo dest û wina vat: “Wazenê cinîyan hepsê keyeyî bikerê û têkoşînê cinîyan zî werte ra wedarnê. Têkoşînê cinîyan seba xo tehdîd vînenê. Ganî wayîrvejîyayîşê cinîyan tena hetêk ra nîno kerdene. Ganî vera hêrişê hemverê Komeleya Rosa û Rojbîn Çetîne her ca ra reaksîyon bêro ramojnayîş. Ganî ma vatişan ra vejîyê û şêrê çalakîyan.”