Şehrîban Abî

 

QERS - Welatîyê taxa Kaleîçî keyeyê înan ke bîyê xirbe seba wareyê sît de yê nêeşkenê viraznê û 14 serrî yo bendeyê ke Wezaretê Kultur û Turîzmî proje bikero faalîyet.

 

Taxa Kaleîçî ke Qers de yew cayê ke wayîrê tarîxêk pîl a û yew cayê ke tewr zêde yena zîyaretkerdişî ya. Seba taxe qilê keleyî de ya, Wezaretê Kultur û Turîzmî 2006 de projeyê ‘Pawitişê awanîyê tarîxî’ plan kerd. Beşêk na taxe seba nê 2014 de ameye vengkerdene û nika welatî pawenê ke no proje bikewo faalîyet.

 

Welatîyê ke 14 serrî yo keyeyê înan na rewşe de yê û nînê tamîrkerdene, bi problemê awe, gaz û xeylê çî bînan dir rî bi rî yê.

 

‘Welatîyê taxe mîyanê rewşêka bêzelalî de yê’

 

Keyayê taxe Şeref Emekçî vat, roj bi roje taxe veng bena û wina vat: “2014 ra heta nika ez keya ya. Keyeyî ameyî vengkerdene, taxe bi xeylê probleman dir ameye rî bi rî. Bi taybetî dimayê ke sey sît ameye îlankerdene dima kesî çareserî nêdî. Merdimî bêzelalî de ciwîyenê. Goreyê projeyê zî keyeyî goreyê terzê Osmanî yenê viraştene.”

 

Leman Şabanoglu ke taxe de ciwîyena wina vat: “Daşir û banyo ameyê sewîyeya ke merdim nêeşkeno bixebitno. Eke keyeyêko pak nêvirazenê, wa verdê ma xo rê viraznê. Serê keyeyê ma ra awe yena. Hewayêko şîdet û cemidnaye yê Qersî esto. Ma perîşan bîyê.”

 

‘Ma wazenê taxa xo de biciwîyê’

 

Makbule Baltuga 80 serrî zî 50 serrî yo taxe de ciwîyena û wina vat: “Ma wazenê keyeyê ma bêrê viraştene.”

 

Kîraz Aydine zî reaksîyon ramojna û vat, ê keyeyêko xerabe de ciwîyenê û ard ziwan ke derheqê projeyî de tu zanayîş seba înan nîno dayene û vat: “Ma nêwazenê nêzelalî de biciwîyê. Ma wazenê taxa xo de biciwîyê.”