MÊRDÎN - Taxê ke girêdayê qezaya Qoserî yê, Dêrik û Artukluyî birnayîşê cereyanî dewam keno. Dewijê dewa Semho yê Artukluyî reaksîyon vera nê dayî û cinîyan verê trafoyî dest bi çalakî kerdî.

 

Hetê DEDAŞî yê Dîcleyî ra bi sebebê deynê înan esto, cereyanê 100 dewê girêdayê Dêrik, Artuklu û Qoserî yê Mêrdînî ameyî birnayene. 25 rojî yo dewa Semho ya Artukluyî bê cereyan a. Cinîyan reaksîyon vera rewşa dayî û verê trafoyî de dest bi nobete kerdî.

 

Edîbe Îlhane: Ma eciz bî. Heywanê ma ziwa bî. Heme hacetê ma veşayî. Ma german ra nêeşkenê vinderê. Ma tîya nobete gênê. Êdî bes o. Ma perîşan bî, wa vengê ma bieşnawê.

 

‘Bi mengêke yo cereyan çin o’

 

Esma Sariyer: Bi nêzdîyê mengêke yo cereyan çin o. Ma bê awe yê, hewa germ a. Sebze û fêkiyê ma wişkî yo. Ma verê trafoyan nobete gênê. Wa selahîyetdarî wayîrê şarê xo vejîyo. Gelo na rewşe heta key dewam bikero.

 

‘Heta cereyan nêro ma nobete de yê’

 

Xezal Aydan: Ma êdî eciz bîyê. Ma nêeşkenê keyeyê xo de roşê. Tena ma verê berê xo de nişnenê ro. Baxçeyê ma pêro wişk bî. Awa depoyan qedêna. Heta cereyan nêro ma do nobete de bê. Ma do heta peynî tîya bê.

 

Tefra Sariyer: Bi di rojî yo ma tîya yê. Yewin waştişê ma oyo ke cereyan bêro. Goreyê xo cereyan birnenê. Ma her hamnan nê çî ciwîyenê. Domanê ma yê qij estê. Ganî çareserîyêk bêro vînayene.