Rojda Aydin

 

ŞIRNEX - Mudirîyê Polîtîkayê Cinîyan ê Şaredarîya Silopî de xebata ramitişê sebze û fêkî ke amebî destpêkerdene dewam kena. Cinîyê ke na xebata şaredarî de ca gênê ardî ziwan ke berardişê înan heme resayî, kom kenê û keyeyan rê vila kenê.

 

Mudirîyê Polîtîkayê Cinîyan ê Şaredarîya Silopî ya Şirnexî ke îdarekerdişê Partîya Demokratîkî ya Şaran (HDP) de yo, verê di mengî taxa Kizirî de 20 donim û taxa Yênîşehîrî zî 9 donim erdî de zebze û fêkî ramitîbî. Ramitiş, eşêf, awdayîş û resnayîşê berardişan heme bi destê cinîyan ame kerdene. Cinîyê ke girêdayê Mudirîyê Polîtîkayê Cinîyan de xebityenê, ardî ziwan ke seba xebat û hetkarîya ke kenê welatîyan zaf kêfweş kerdê.

 

Psîkolog Besna Tokaka ke giradayê Mudirîyê Polîtîkayê Cinîyan de xebityena, ard ziwan ke prosesê pandemî de şar bi xeylê probleman dir rî bi rî mend û vat: “Ma menga Nîsane de dest bi ramitişê balîcanan, bamya, xiyar, îsot, fêkî û xeylêk çî bîn kerd. Ramitişê zebze û fêkî de cinîyan ca girewt. Ma bi ramitiş wazenê hetkarî bidê şarî. Ma keyeyê ke rewşa înan baş nîyê dîyar kenê, zebzeyê ke kom kenê benê înan rê. Ma wazenê nê prosesê zor û zehmetî de verê şarê xo de bê û binê psîkolojîyê xirab ra vejîyê. Cinîyan nê prosesî de rolêko girîng kay kerd. Bi nêzdîyê mengêke yo ma dest bi komkerdişê berardişan kerdo. Seba nê prosesî cinîyê Silopîyijî nêeşkenê bêrê hetkarîya ma. Coka ma xebatkarê cinî ê şaredarî yenê kom kenê. Ma her roje yenê berardişan kom kenê û keyeyan rê vila kenê.”

 

‘Ma xo resna 20-30 keyeyan’ 

 

Besna, ard ziwan ke dimayê ke nê berardişê înan qedîya, do dima ra dest bi xebata sera bikerê û wina vat: “Ma fek xebata xo ra vera nêdanê. Ma do xebata xo ya sera zî cinîyan dir bikerê. Ma cinî ma do her ware de ca bigîrê. Gama ke ma xebata xo kenê û keyeyan geyrenê ma tedbîrê xo yê seba nêweşîye zî gênê. Çarçewaya na xebate nêzdîyê mengêke ya ma dest bi komkerdişê berardişî kerdo û ma nê berardişê xo heta nika 20-30 keyeyan rê vila kerdo.”

 

‘Şarê ma zaf kêfweş beno’

 

Ekonomîst Bêrîvan Şayike zî vat ke şar bi xebata înan zaf kêfweş beno û wina vat: “Nê prosesî de şarê ma xeylêk rojanê zor û zehmet derbaz keno. Seba ke ma piştdayîşê welatîyan bikerê ma na xebate da destpêkerdiş. Nê berardişê ke ma kom kenê ma keyeyê ke qeza de yê danê înan. Wexto ke ma keyeyan rê benê, no înan zaf kêfweş keno. Gama ke şarê ma kêfweş beno û pozîtîf nêzdî beno ma zî kêfweş benê. Ma wazenê ke hem hetê ekonomî û hem hetê psîkolojîk şarê xo rê bibê hetkar. Seba şarê ma çi destê ma ra bêro ma do bikerê.”