Fîlîz Zeyrek

 

EDENE - Cinîyê HDPyîj û HDKyijî reaksîyon vera destbendkerdiş û tepiştişê hemverê cinîyan ramojnayî û vatî, kampanya ‘Têkoşînê cinîyan her ca de yo’ bîya hedef. Cinîyan da zanayene ke do pêwa her çî têkoşînê înan dewam bikero.

 

Teda û hêrişê hemverê cinîyan roj bi roje dewam kenê û rojê vîyarte de aktîvîstê TJAyî Sevîl Rojbîn Çetîne bi îşkenceyî dir rî bi rî mendebî. Hemverê Komeleyê Cinîyan a Rosa, operasyon ameybî kerdene. 10ê temmuze de zî Edene û Mersîn de zî saetê siba de sereştişê keyeyan de xeylêk kesî ameyî destbendkerdene. Mersîn de Sever Uzun û Zeynep Taşgire ameyî destbendkerdene û sewqê Emnîyetê Edenî ameyî kerdene. Cinîyan reaksîyon vera rewşe dayî.

 

‘HDP partîyêk cinîyan o’

 

Verfeka Meclîsê Şaristanê Kongreya Demokratîkî ya Şaran (HDK) Selda Kaya vat, sebebê hêrişan oyo ke AKP-MHP dînamîkê xo bi lez vindî keno û vat: “Tersê îqtîdarê HDPyî yo. HDP partîyêk cinîyan o û hêzê xo cinîyê têkoşeran ra gêno. AKP bi hawatêko şîdet hêriş keno û sebebê nê zî oyo ke seke verê nêeşkeno rayîra bero. AKP-MHPyî seba hêzê demokrasî çin bikero her het ra hêriş keno. Nê hêrişî bi taybet hemverê cinîyanê ke têkoşînê azadîye danê yo. Wazenê înan bitepişo, bitersno, bi şîdet bipelçiqîno. Zîhniyetêko cinîyan çin hesibneno, hemverê cinîyan de yo. Çira wina kenê? hemverê cinîyanê HDPyî wina kenê. Wazenê omidê weçînoxê kurdan bişkinê, mîyanê kurdan de parçebîyahîşêk bi ca bîyarê.”

 

‘Goreyê îqtîdarî komelî de cayê cinîyan çin o’

 

Seldaye dewam de da zanayîş ke goreyê îqtîdarî, komelî de cayê cinîyan çin o û wexto ke cinî vera nê fehmî cinî benê wayîrê potansiyelê vurnayîşî rastê hêrişan yenê. Selda wina vat: “AKP seba nê cinîyan teberê ciwîyayîşî de gêno. Hemverê cinîyanê HDPyî hêriş zêde kerdî. Do tewr zêde zî bikero. Vera nê bêguman xurtbîyayîşê cinîyan xeylêk girîng o.”

 

‘Ma do têkoşînê xo dewam bikerê’

 

Endama Meclîsê Partîya HDPyî Helîn Kaya zî reaksîyon vera hêrişan da û hemberê krîmînalîzekerdişê rêxistinbîyayîşê cinîyan yeno kerdene û wina vat: “Tayînkerdişê qeyûman de ma vînenê ke hedefê ewil cinî yê. Cinîyê polîtîkî, wayîrê hişmend ê û ey nêwazenê. Wazenê cinîyan hepsê keyeyî bikerê, çin bikerê. Coka kampanyaya ‘têkoşînê cinîyan her ca de yo’ hedef gênê. Ma cinî vera nê her ca de bê. Ma nê hêrişan qebûl nêkenê, ma vanê cinî tena nîyê. Ma do têkoşînê xo her wext dewam bikerê.”