WAN - Keyeyê ke gorê domananê înan bi sebebê nameyê ‘kod’ ameyî texrîbkerdene, reaksîyon ramojnayî û vatî: “Amancê esasî oyo ke domanê ma, têkoşînê domananê ma bidê xovîrrakerdiş. La her ku ê birijnê, ma do newe ra viraznê.”

 

Hêrişê hemverê cezaneyê PKKyijan, hêrişê hemverê merasîmê cenazeyan, tedayê serê keyeyan, hêrişê vera goristanan dewam kenê. Gorê Muhammet Necîp Çagan û Orhan Bozan yê ke dewa Şarbazarî ya Gelîyê Zîlanî yê Erdîşî de bî ameyî texrîbkerdene.

 

Dayîka Muhammet, Bîlnaz Çagane wina vat: “Lajê mi 2013 de beşdarê PKKî bi. Tedayê serê şarê Kurdî dî, vera nê têkoşîn kerd. Di serrî ra dima Şemzînanê Colemêrgî de pêrodayîşêko de cuya xo vindî kerd. Dejê ma xora teze yo, la bi hêrişê hemverê gorî reya diyîn dejê ma gane kerdî.”

 

‘Her ke ê texrîb bikerê ma do tamîr bikerê’

 

Bîlnaze dîyar kerd ke menga nîsane de qerekole veng dayo înan ke şêrê goristan û wina vat: “Keya, ma geyra û vat, qerekole veng dana şima. Mêrdeyê mi şi goristan, leşkerî serê gor de vindertê ke gor bişkînê. Seba ke kodê ci ser de bi dozgerî talîmat dayo. Ma zanê ke no seba pakkerdişê hişî yeno kerdene. Yewin amancê înan oyo ke domanê ma, têkoşînê înan bidê xovîrrakerdiş. Her ke ez şina serê gorê ey, ez vana qey newe şehîd kewto. Her ke ê texrîb bikerê, ma do zî viraznê. Ma muracatê ÎHDyî da.”

 

‘Ganî ma wayîrê goran vejîyê’

 

Dayîka Ozan, Resîme Bozane zî wina vat: “Lajê mi 2013 de beşdarê tevgerê azadîye bi û 5 serrî ra dima Hesekî de  hêrişê DAIŞî de cuya xo vindî kerd. Her ke dewlete teda kena, ciwanî xo ver danê. Seba kodan yenê goran texrîb kenê. La ma do heta peynî wayîrê goranê xo vejîyê. Ê çiqas birijnê zî ma do reyna viraznê.”