ENQERE - Vervatoxa HDPyî Ebru Gunaye safhaya diyîne ya çalakîyanê Bernameyê Têkoşînê Demokratîkî eşkera kerde. Ebrûye îfade kerd ke HDP do pê ruhê 14ê temmuze xoverdayîş pîl bikero.

 

Vervatoxa HDPyî Ebru Gunay kombîyayîşê çapemenîye yê hewteneyî de serebûtê rojdemî ercnayî. Ebru Gunaye safhaya diyîne ya çalakîyanê Bernameyê Têkoşînê Demokratîkî eşkera kerde. 

 

Ebrûye vist vîrî ke safhaya diyîne ya çalakîyanê Bernameyê Têkoşînê Demokratîkî ya 3 mengan roja dişemeyî hetê Hemserekanê HDPyî ra dîyaye destpêkerdene û vat: ''No bername 1ê hezîrane de pê dokumentê tewirî yê 9 madeyan dîya destpêkerdene. Ma bernameyê xo yê têkoşînî menga hezîrane de Colemêrgî  û Edîrne ra heta Anqara rixmê astengîyan zî dewam kerd. Safhaya diyîne ya bernameyê ma yê têkoşînî de ke bi nameyê 'pîya' dîyaye destpêkerdene, ma do bimojnê ke ma eşkenê vera îqtîdarî muxalefet bikerê û rayberîya naye bikerê. Ma do pê ruhê 14ê Temmuze hêzê xoverdayîşî pîl bikerê. ''

 

Ebrûye bale ante hêrişanê polîtîkayanê şerî yê hukmatê AKPyî ser û vat: ''Nê polîtîkayî Tirkîya rê fayde nêkenê. Ma AKP hîşyar kenê ke şero ke dişmenîya kurdan ra derbazê sîyasetê teberî kerdo, hetê kurdan û şaranê Tirkîya ra nêno tesdîqkerdene. Beragehanê xo yê teberê welatî wedarê, operasyonan vindarnê, meseleyan pê dîyalogan çareser bikerê. Nêbo îqtîdar do çin bibo.”

 

Ebrûye derheqê tecrîdê vera Rayberê PKKyî Abdullah Ocalanî de nê çîyî vatî: “Tecrîdê vera Birêz Ocalanî wedarê. Fikranê ey ê seba çareserîya meseleyanê Tirkîya ra îstîfade bikerê. Şer bi nê hawayî do biqedo.”