Şehriban Aslan

 

MELETÎ - Emîne Şenyaşare ke mêrde û lajê aye û birayê wekîlê AKPyî cuya xo vindî kerdî û lajêk zî ame tepiştene ra dima mîyanê têkoşînê edaletî de ya. Emîne persa, “Seba ke edalet bêro gerek ma bimirê?” Kerd.

 

14ê hezîrana 2018î de qezaya Pirsûsî ya Riha de merdim û pawitoxanê wekîlê AKPyî Îbrahîm Halîl Yildizî hêrişê dikana keyeyê Emîne Şenyaşarî kerdbi û hêriş de Haci Esvet Şenyaşar û lajê ey Celal û Adil Şenyaşar, birayê Yildizî Mehmet Şah Yildiz kişîyayî. Roniştişê 2. yê dewa Mehkemeya Cezaya Girane ya Meletî de ame kerdene. Avûkatanê Mehmet Şah Yildizî xîret kerd ke dewa provake bikerê. Fadil Şenyaşaro ke 2 serrî yo ke zîndan de yo, pawitişê xo de da zanayene ke o Mehmet Şah Yildiz nêkişto.

 

Mehkema taloqê 2yê teşrîna verêne bîye

 

Roja ke mêrdeyê Emîne û lajê ci ameyî qetilkerdiş ra nata netîceyê têkoşînê ci de îddîaname hetê Serdozgerîya Komara Rihayî ra ame hadirkerdene. Dosyaya dewa seba sebebê asayîşî berdî Meletî. Vizêr ronştişê diyîn ê dewa Mehkemeya Cezaya Girane ya Meletî de ame kerdene. Roniştiş de Emîne Şenyaşare, lajê ci Fadil û avûkatî beşdar bî. Roniştiş taloqê 2 yê teşrîna verêne ame kerden.

 

‘Lajê mi rê îftîra kenê’

 

Emîne Şenyaşara ke mêrde û 2 lajê aye kişîyayî derheqê serebûtî de nê çîyî vatî: ''Ê ma bi îdîaya rêxistine sûcdar kenê. Eke wina yo çira kîracîyê mi polîs û leşker ê. Tornê mi xebera hêrişî daye mi. Ez şîya ver bi dikane. Cîrananê mi nêverda ez şora vatêne lajê mi kişîyayê. Vatêne 'meşo to zî kişenê.' Polîsan dormeyê dikane girewtbi, nêverda ez şora. Dima ez pê wesayîtêkî şîya nêweşxane. o çax mi dî ke mêrdeyî mi her cayê xo ra kard bîyo. Verê çimanê mi de nêweşxane de Haci kişîya. Mi firsend nêdî ke domananê xo bivîna.”

 

‘Wa rastî vejîyê meydan’

 

Emîne veng da ke Fadilî serbest vera bidê û tewr peyîn wina vat: “Ma keye de tena hîrê kesî mendî. Eke lajê mi vera nêdanê wa vajê, ma zî şêrê xo Enqere de biveşê. Ma zî nê derdî ra xelas bibê. Çunke ma rê êdî çareyêk nêverdayî. Ma gerek vera nê zulmî bimirê? Domananê mi zî kiştî. Qeydê kamerayê nêweşxane nêvejênê, qeydê dikanî nêvejenê. Êdî bes o! Wa qeydan bîyarê rastî vejîyê werte.”