QERS - Merkezê Paştdyîşê Cinîyan yê Qersî di mengê peyîn de destek da 500 cinîyan. Berpirsîyar û pisporê xizmetê komelî ya merkezî Zehra Anliye waşt ke cinî, Xeta Morî ra xo biresnê înan.

 

Şaredarîya Qersî ya Partîya Demokratîke ya Şaran (HDP) 6ê Gulane de Merkezê Paştdayîşê Cinîyan awan kerd. Merkezê paştdayîşî ke dimayê akerdişî dest bi faalîyetê xo kerd, resa xeylêk cinîyan. Berpirsîyar û pisporê xizmetê komelî ya merkezî Zehra Anliye derheqê xebatê ke kerdê de qisey kerd.

 

Ma xo resna 500 cinî

 

Zehra da zanayîş ke înan prosesêko şîdet zêde bîyo de Merkezê Paştdayîşê Cinîyan akerdê û vat heta nika înan xo resnayo 500 cinî û hetkarîya înan kerdê. Zehra vat, cinî eşkenê serê 'Xeta Morî' de xo biresnê înan.

 

Her ware de paştdayîş danê cinîyan

 

Zehra dewam de wina vat: “Di mengê peyîn de xeylêk muracatî seba merkezî virazyayî. Ma paştdayîşê psîkolojîk, huqûqî, şexsî danê cinîyan. Xeylêk cinîyê teberê şaristanî wazenê ke paştdayîş bidê û ma înan dir mîyanê cigêrayîşî de yê. Wextê pandemîye de barê cinîyan zêde bi. Cinîyê ke ma înan dir qisey kerd, ardî ziwan ke camêrdî qîrenê înan ser, şîdet bi înan kenê û xo înan ser o tatmîn kenê. Wextê pandemî de şîdetê camêrdan serê cinîyan de hîna zêde bi.”

 

‘Her şaristanî ra cinî eşkenê xo biresnê ma’

 

Zehra reyna ard vîr ke cinî eşkenê serê 'Xeta Morî' de hûmara: 0472 223 44 79 xo biresnê înan. Zehra da zanayene ke tena Qers ra ney, her şaristan ra xo eşkenê biresnê înan.

 

‘Ma tîya yê’

 

Zehra dîyar kerd ke hemverê şîdetî bêveng nêmanê û vat: “Cinî bi tersê 'Ez fek mêrdeyê xo ra vera bidî do çi bêro sereyê mi’ ciwîyenê. Cinî cesaret nêkenê ke ma bigeyrê û derdê xo û problemanê xo ma ra vajê. Ma her bi keyeyî dir mîyanê têkilî de yê. Ma veng danê înan ke bêrê merkezê paştdayîşî û ma înan dir rî bi rî qisey bikerê. Amancê ma oyo ke ma cinîyan ra vajê şima bi hêz ê û ma verê şima de yê.”