AMED - Endama Meclîsê Ciwananê HDPyî Berîtan Yaşare dîyar kerd ke bi taybetî hemverê cinîyanê ciwanan, hemverê heme hetê komelî furyayê hêrişî dewre de yê û vat: “Cewabê ma yê seba hêrişan do her wext rêxistinê ma hîna zêde bo. Ma do fek têkoşîn ra vera nêdê.”

 

Hêriş û tedayê hemverê cinîyan dewam kenê û 2 mengê peyîn de xeylêk cinî ameyî destbendkerdene û tepiştene. Bi taybetî çarçewaya tehqîqatê hemverê Komeleya Cinîyan a Rosa ameye destpêkerdene, Amed de 18 kesî ameyî destbendkerdene û ci ra 12 kesî ameyî tepiştene. Hemverê KCDyî de zî operasyono ke ame destpêkerdiş de zî nêzdîyê 30 cinî ameyî tepiştene. Aktîvîsta TJAyî û endama Heyetê Îdarekara Herême a Demokratîke Sevîl Rojbîn Çetîne zî keyeyê xo de rastê îşkenceyê polîsan amebî û 11 rojî destbendkerdiş ra dima ameye tepiştene.

 

Endama Meclîsê Ciwananê HDPyî û aktîvîsta TJAyî Berîtan Yaşare hêrişê hemverê cinîyanê Kurdan de ercnayîş kerde û vat, ganî cinî xo hîna rêxistin bikerê.

 

‘Xelasyayîşê cinîyan xelasbîyayîşê komelî yo’

 

Berîtane dîyar kerd ke cinîyê kurdî her wext rastê hêriş û tedayan yenê û wina vat: “Îtîrazê cinîyanê Kurdan vera nê sîstemî esto. Seba ke nê hêrişî bêrê teşhîrkerdene, têkoşînêk cinîyanê Kurdan ê girîng babeta vatişî yo. Ma wayîrê fikr û ewnîyayîşê, cinî azad biba, komel zî azad beno yo. Têkoşînê cinîyan tena xelisyayîşê cinîyan nîyo, xelasbîyayîşê komelî yo zî.”

 

‘Ganî ma her yewî cîya cîya teşîr bikerê’

 

Berîtane da zanayîş ke ganî hêrişê vera cinîyan bi kûrayî bêrê destgirewtene û wina vat: “Zîhnîyetêko camêrdan babeta vatişî yo û ganî tesîrê ke nê zîhnîyetî vejeno werte bêro vînayene. Ganî problem bêro tespîtkerdene û çarserî wina bêro kerdene. Ganî ma nê polîtîkayan teşhîr bikerê. Ganî ma hêrişê vera cinîyan bi kûrayî cigêrayîş bikerî, teşhîr bikerê. Herême de hemverê cinîyan bêtehemulîyek esto. Destkewtişê ke ameyê destkerdene zî bîyê hedefê îqtîdarî. Ma cinîyê ciwanî hêrişê hemverê têkoşînê ma qebûl nêkenê. Vera hêrişan ma do bi hewayêko topyekun têkoşîn bikerê.”

 

‘Ma do tewr zêde xo rêxistin bikerê’

 

Berîtane dîyar kerd ke tevgerê cinîyê azadî yê Kurdan tevgerêko dinya de yeno nasnayîş o û wina vat: “Tevgerê cinîyê Kurdan êdî bi girs bîyo. Her kes tevgerê cinîyê Kurdan zano. Sebebê hêrişan no yo. Hêrişê hemverê Rosa û TJAyî zî esasê xo tîya ra gêno. Pîlbîyayîş û rêxistinbîyayîşê cinîyê Kurdan ra tersenê. Ma do her wext Gulîstan Doku pers bikerê. Ma do qet têkoşînê xo ra fek vera nêdê.”