AMED - Xizmetê ke seba taxa Palûkê Sûrî ameyne kerdene, dimayê tayînkerdişê qeyûmî ame vindarnayene. Cinîyê ke taxe de ciwîyenê problemê seke komnêkerdişê çopan, lêşinîyê awe û çinbîyayîşê rayîrî ardî ziwan û vatî: “Tayînkerdişê qeyûmî dir seba taxe çîyêk nêame kerdene û ma probleman dir rî bi rî mendî.”

 

Welatîyê taxa Palûkî ke Sûrî yê Amedî de ciwîyenê, bi taybetî bi pesdewarî dir debara xo kenê. Camêrdî bazarê heywanan de xebityenê û cinî hem heywanan wey kenê û hem zî tenûran viraznenê. Xeylê wekatîyê taxe feqîr ê. Bi taybetî nika taxe de problemê komnêkerdişê çopî, awe û rayîrî esto. Dimayê tayînkerdişê qeyûmî yê şaredarîya Sûrê Amedî, xizmetê ke ameyne kerdene, ameyî vindarnayene. Nê problemê bîyaye zî xeylê xo tesîr cinîyan rê kenê. Cinîyan waşt ke wa problemî bêrê çareserkerdene. 

 

Melek Tatliya sere de qalê ciwîyayîşê taxe kerd û vat: “Ma bi pesdewarî debara xo kenê û xeylê welatîyê taxe zî bi pesdewarî dir eleqedar benê. Seba ke tîya bazarê heywanan esto û welatî

pêro tîya xebityenê. Cinî zî seke her wext hem bi karê weykerdişê heywanan û hem zî bi karê keyeyî dir eleqedar benê. Sewbîna cinîyê ke na taxe de ciwîyenê, bi viraştişê tenûran dir zî hetkarî danê keyeyê xo. Taxa ma taxêka feqîr a. Seba nê zî xeylêk keyeyî domananê xo nêerşawenê mektebe û domanî zî seba debara keyeyî mecbûr manenê ke bixebityê."

 

‘Çopan kom nêkenî...’

 

Meleke, qiseykerdişê xo de bale ante serê problemê sereyîn ê taxe û wina vat: “Nika problemê ma yê sereyîn komkerdişê çopî yo û sewbîna awa ke herrî ci de ya. Nê problemî ganî hetê şaredarî ra bêrê çareserkerdene. La qeyûm problemanê ma peygoş keno. Awa ma her wext qut bena û wexto ke yena zî bi herrî yena. Nê çî seba ma problem ê. Sewbîna nêkomkerdişê çopî zî seba ma tehluke yo. Taxe nîna pakkerdene. Sewbîna serrê vîyarte de tîya seba cinîyan şaredarî kursanê neqş û deştişî akerdib, la dimayê tayînkerdişê qeyûmî nê kursî ameyî padayene.”

 

‘Kes taxe rê eleqedar nêbeno’

 

Yildiz Demîre zî derheqê taxe de qisey kerde û vat: “Awa ma de herrî esta. Coka domanê ma nêweş kewenê. Awa ma çem ra yena. Sewbîna qanalêko awe nêzdîyê keyeyê ma yo, labelê boyan ra ma nêeşkenê balkone de roşê. Kes taxe ma ra  eleqedar nêbeno. Awa ma lêşin yena û coka ma potikêk bi musluxe ra girêdanê û ma hewl danê ke awe pak bikerê. Eynî wextî de taxe ma bi hewayêko pak nîna dermankerdiş û no çî zî rayîr ver bi nêweşîyan akeno.”

 

‘Çîyê bi hewce nînê kerdene’

 

Cinîya bi nameyê Ayhan Yilmaze zî qalê problemê taxe de wina kerd: “Seba taxe çîyê bi hewce nînê kerdene, rayîr verê xetereyan akeno. Çîyo tewr balkêş zî vernîya weçînayîşî postaxaneyêk tîya ame akerdene, la dimayê weçînayîşî zî postaxane ame padayene. Sewbîna dimayê ke qeyûm ame tayînkerdene zî tewr zêde xizmet ame kêmkerdene. Rayîrê taxe xira yo û çîyêk nîno kerdene. Ma nê probleman ra eciz ê.”