EDENE - Krîzê ekonomîye bi vîrusî dir tewr giran bi û tesîrêko pîl serê welatîyan de keno. Esnafanê bazarî vat ke ‘ma mîyanê deynan de yê. Seba ke ma nanê xo yê rojane vejê, şikir kenê.’ Welatîyê ke seba dayîş û girewtişî ameyî bazar zî seba berardişê erjan bivînê, seranserê roje bazar de geyrenê.

 

Krîzê ekonomîye bi vîrusî dir tewr giran bi û tesîrêko negatîf serê welatîyan de keno. Welatî ameyî sewîyeya ke êdî nêeşkenê xo rê sebze zî bigîrê. Qezaya Seyhanî ya Edenî de taxa Şakîrpaşa de ma bazar de şîroveyê esnaf û welatîyan girewt.

 

‘Ma bi zirar roşenê’

 

Adalet Ozkaya ke bazarê cil û belgan roşena vat: “Ma erjan danê zî kes nêgîno. Her kes bi zirar malê xo roşeno. Ez bincil, cil û pîjameyan roşena. Karê ma qet nêbeno. Ma nêeşkenê şîyayeyê xo rojane vejê. Ez hewte de di rojan yena bazar. Debare zehmet bîya. Her kes têduşt o. Kar çin o, yê ke keye de yê wina ronişteyê. 3 mengî karê ma vindert. Kes nêxebityayîne. Ma dest bi karê sebze û fêkîyan kerd. Karêk ma nêvirazîya ma fek vera da. Faturayê ceyranê ma hezar TL ame. Ma bi zor pere kom kerd û da. Di rey awa ma birnayî. Ma kelepçe şiknayî, ameyî 6 hezar ceza birnayî.”

 

‘Tena şîyayê mitbaxî vejîyo bes o’

 

Esnaf Nacîye Îlaslane zî ard ziwan ke pandemîye de karê înan vinderto û vat: “Ma vindî kerd. Ez nika bi erebokê destan yena. Deynê ma estbi, coka ma wesayîtê xo rot. Seba nanê ma yê rojane vejîyo, ma şukur kenê. Vayî nêkonê. Fîyatê fêkîyan bîyo 10 lîra. Nika karê me tay abi. La qezencê ma heme şono deynan. Nê rojan ceyran ame birnayene. Ma deyn kerd û fatureyê xo da.”

 

‘Keyeyê ke domanê înan estê zehmetî ancenê’

 

Necla Încete zî derheqê dayîş û girewtişî de wina vat: “Mi lîmon girewt, 5 kîlo balcanî girewt. Kîloyê îsotî 6 lîra. Mecbûra nîm kîlo bigîrî. Tu erjê perî nêmendo. Ma qezencê xo yê hewtane 100 TL seba bazarî visnayene. 100 Lîra zî seba şîyayê bînan. Ma wina debara xo kenê. La keyeyê ke nêeşkenê nê zî bigîrê. Keyeyê ke domanê înan estê, nêeşkenê debara xo bikerê.”

 

‘Xeylêk rey ma nêeşkenê bêrê bazar’

 

Kamîle Avane zî bi 40 lîra ameya bazar, reaksîyon vera rewşe da û vat: “Seba ekonomîye ma xeylêk rey nînê bazar. Keye ra hîrê kesî tepişte yê. Ez xebityena la lingê mi de protez esto, nika nêeşkena bixebityî. Mêrdeyê mi teqawît o û hezar TL meaşê ci esto. Sewbîna meaşêk çin o. Ma zehmetîyan ancenê.”