DÊRSIM - Tehqîqatê Gulîstane Doku de dîmenê kamera ameyî cigêrayene. Kamera de dîmenê şikdar Zainal Abarakovî ameyî dîyene la ê babîyê ci Engîn Yucelî nêameyî dîyene.

 

Wendekara Zanîngehê Munzurî Gulîstan Dokuye 5ê çeleyî ra nata vînbîyaye ya. Tehqîqatê Gulîstan Doku de dîmenê neweyî vejîyayî werte.

 

Pêvînayîşê bi Zaînalî dir vejîya werte

 

Serdozgerîya Komare ya Dêrsimî dîmenanê kameraya nêzdîyê keyeyê şikdar Zainal Abarakovî ser o cigêrayîş kerd. Rixmo ke şikdar Abarakov û babîyê ci Engîn Yucel heman keyeyî de manenê la kamera dîmenê Abarakovî girewtî lê kamera de dîmenê Yucelî çin ê.

 

'Dîmenêk nêameyo tespîtkerdene'

 

Balkêş o ke 5ê çeleyî saete 08:00 ra heta şewe 00:00 kamera de dîmenêk çin o. Dîmenê ke Gulîstane 4ê çeleyî de cayê karî ra vejîyena û şina ver bi keyeyê Abarakovî, Abarakov zî keyeyê xo ra nişeno wesayîtê xo, îlaweyê dosya bîyî. Dîmenanê kamera de yeno dîyene ke roja 6ê çeleyî Abarakov pê wesayîtê xo yeno otoparka taxa xo.